પોરબંદર સરકારી હોસ્પિટલનો નર્સિંગ સ્ટાફ પ્રતિક ઉપવાસ પર ઉતર્યો

પોરબંદરઃ શહેરની સરકારી હોસ્પિટલના નર્સિંગ સ્ટાફ દ્વારા પડતર પ્રશ્નોને લઈ અનેક રજૂઆતો કરી ચૂક્યા છે, પરંતુ તેમની આ સમસ્યા સરકારે ધ્યાને ન લેતા હોસ્પિટલના સ્ટાફ દ્વારા પ્રતિક ઉપવાસ કરવામાં આવ્યા હતા.

પોરબંદરની ભાવસિંહજી સરકારી હોસ્પિટલના નર્સિંગ સ્ટાફ દ્વારા પ્રતિક ઉપવાસ કરવામાં આવ્યા છે. હોસ્પિટલ નર્સિંગ સ્ટાફના બ્રાંચ સેક્રેટરી અલ્પેશ નાંઢાએ જણાવ્યું હતું કે, સ્ટેટ લેવલના યુનિયનના દ્વારા નર્સિંગ સ્ટાફના પડતર પ્રશ્નો અંગે પ્રતીક ઉપવાસ કરવામાં આવી રહ્યા છે. જેમાં પોરબંદર નર્સિંગ સ્ટાફનો પૂરતો ટેકો છે.

તદ્ઉપરાંત આ પ્રતીક ઉપવાસ અહિંસા પૂર્વક અને શાંતિ પૂર્વક કરવામાં આવી રહ્યા છે. પ્રતીક ઉપવાસ દરમિયાન દર્દીઓને આપવામાં આવતી સેવાઓ ચાલુ રાખવામાં આવી છે. ઉપવાસનો આ ત્રીજો તબક્કો છે, જો હજુ અમારા પડતર પ્રશ્નો નહિ ઉકેલાય તો, યુનિયન દ્વારા નક્કી કરવામાં આવેલ પગલાં પોરબંદર નર્સિંગ સ્ટાફ દ્વારા લેવામાં આવશે.