કોરોનોનો કહેર: પોરબંદરમાં IMAના ડૉક્ટરો સેવા આપશે

વિશ્વમાં કોરોના વાઇરસનો કહેર યથાવત છે. ભારતમાં કોરોના વાઇરસના 325થી વઘુ કેસ સામે આવ્યાં છે અને 7 લોકોના મોત થયાં છે. ગુજરાતમાં 18 કેસ કોરોના પોઝિટિવ આવ્યાં છે. પોરબંદરમાં કોરોના વાઇરસના પગલે સિવિલ હોસ્પિટલમાં સ્પેશિયલ આઈસોલેશન વોર્ડ તૈયાર કરવામાં આવ્યા છે. હોસ્પિટલમાં તબીબો તથા સ્ટાફની અછત હોવાથી ઈન્ડિયન મેડિકલ એસોસિએશનના (IMA) ખાનગી તબીબોએ દર્દીઓને સેવા આપવાનો મહત્વપૂર્ણ નિર્ણય કર્યો છે.

પોરબંદર: ઈન્ડિયન મેડીકલ એસોસિએશન પોરબંદરના પ્રમુખ ડૉક્ટર ઉર્વીશ મલકાણે જણાવ્યું કે, કોરોનાની ખૂબ જ કઠિન પરિસ્થિતિમાં ઈન્ડિયન મેડીકલ એસોસિએશન પોરબંદરના તમામ ડૉક્ટરો જિલ્લા વહીવટીતંત્ર અને પોતાની માનદ સેવાઓ પૂરી પાડવા માટે આહ્વાન કર્યું છે. જિલ્લા કલેકટરની સૂચના પ્રમાણે ભાવસિંહજી સિવિલ હોસ્પિટલમાં દરરોજ સવારે અને સાંજે એક-એક કલાક અને પીડિયાટ્રિશ્યન એટલે કે, બાળક રોગ નિષ્ણાંતો પોતાની સેવા પુરી પાડશે.

આ બાબતે તમામ ડૉક્ટરે પોતાની સેવા આપવા માટે ખાતરી આપી છે અને તે અંગે વ્યવસ્થિત આયોજન કરી લેખિતમાં કલેકટર સાહેબ અને સિવિલ સર્જનને જાણ કરી દેવામાં આવી છે. આવી કપરી સ્થિતિમાં પોરબંદરની પ્રજાની સેવા માટે તમામ પ્રાઇવેટ ડૉક્ટરો તત્પર રહેશે.