પોરબંદરના વનાણા ટોલનાકા પર ટોલ ભરવા બાબતે 10 લોકોએ કરી તોડફોડ

પોરબંદર: જિલ્લાના વણાટ ટોલટેક્સ ખાતે સાંજે 6.30 વાગ્યે ટોલ ટેક્સ આપવા બાબતે ઝઘડો થતા 10 જેટલા લોકોએ એકઠા થઇ 8 ટોલબુથ સહિત ઓફીસમાં તોડફોડ કરી હતી. આ સમગ્ર ઘટનાને પગલે પોરબંદર જિલ્લાની પોલીસ ઘટના સ્થળે દોડી ગઈ હતી. ત્યારે આ મામલે CCTV ફૂટેજના આધારે આરોપીઓને પકડવાની કાર્યવાહી હાથ ધરવામાં આવી છે.

પોરબંદરમાં આવેલા વનાણા ટોલ નાકા પર થયેલી તોડફોડના પગલે પોલીસ વિભાગ દ્વારા અલગ અલગ CCTV ફુટેજ મેળવવાની કામગીરી હાથ ધરી છે. આ સાથે જ ટોલનાકા પર કુલ 33 સિક્યુરીટીના કર્મચારીઓ અલગ-અલગ શિફ્ટમાં કામ કરતા હોય છે, જેમાના 8 સિક્યુરિટી કર્મચારીઓ ઘટના સમયે હાજર હતા. તેમજ 28 જેટલા CCTV કેમેરાના ફુટેજ મેળવીને પોલિસ વિભાગ દ્વારા આગળની તપાસ હાથ ધરવામાં આવી છે.

આ ટોલ પ્લાઝા 8 ટોલબુથ અને ઓફીસમાં રહેલા 3 કૉમ્પ્યુટર સહિત એક બોલેરો કારનો કાચ પણ 10 લોકોએ તોડ્યા હોવાનું જણાવ્યું હતું. તો હાલ તમામ 2 ટોલ બુથ છોડી અન્ય ટોલ બુથ ચાલુ કરી દેવામાં આવ્યા છે. ત્યારે CCTV ફૂટેજ બાદ જ વધુ માહિતી આપી શકાશે.