પાટણ: શહેરમાં એક સપ્તાહથી મેઘરાજાએ મહેર કરી અનાધાર વરસતા શહેરના મહોલ્લા પોળો સહિતના મુખ્ય માર્ગોની હાલત બત્તર બની છે. હિંગળાચાચરથી જુનાગંજ તરફ જવાનો માર્ગ, જનતા હોસ્પિટલ માર્ગ, કસાવાડાથી મીરા દરવાજા તરફનો માર્ગ,દોશીવટથી ગંજશહીદ પીરનો માર્ગ,કાલી બજાર, રાજકાવડો,બુકડી,તથા સલવિવાડા સહિતના માર્ગો પણ વરસાદી પાણીના કારણે ધોવાણ થતા માર્ગોપર ઠેર ઠેર ખાડા પડ્યા છે. જેને લઇ અહીંથી પસાર થતા વાહનચાલકોની સ્થિતિ કફોડી બની છે.તો કેટલાક વાહનો ખાડામાં પટકાતા નુકસાનગ્રસ્ત પણ બન્યા હોવાના કિસ્સાઓ સામે આવ્યા છે, તો બીજી તરફ દ્વિચક્રી વાહન ચાલકો ખાડામાં પટકાઈ ઇજાગ્રસ્ત બન્યા હોવાના બનાવો પણ બન્યા છે.
શહેરના મોટાભાગના માર્ગોપર ચોમાસા પૂર્વે જ નગરપાલિકા દ્વારા કોન્ટ્રાક્ટર મારફતે વિવિધ ગ્રાન્ટમાંથી પેવરનું કામ કરાવવામાં આવ્યું હતું.જોકે હલકી ગુણવત્તાનું કામ થયું હોવાને કારણે ટૂંકાગાળામાં જ પ્રથમ વરસાદે પેવર કરેલા માર્ગોનું ધોવાણ કરતા માર્ગો બિસ્માર બન્યા છે. ત્યારે નગરપાલિકા તંત્ર તાકીદે આ બિસ્માર બનેલા માર્ગનું સમારકામ હાથ ધરે તેવી લોકમાંગ ઉઠવા પામી છે.
