Police Grade-Pay: પાટણમાં પોલીસ કર્મચારીઓએ હાઈવે પર ચક્કાજામ કર્યો

પાટણમાં ગ્રેડ-પે વધારાની માંગણી સાથે પોલીસ પરિવારની મહિલાઓએ સરકાર સામે બંડ પોકારી પોલીસ કવાટરમાંથી રેલી સ્વરૂપે બગવાડા દરવાજા ખાતે પહોંચી ધરણાં કરી હતી. બાદમાં રાત્રે શહેરના નવજીવન ચાર રસ્તા પર પોલીસ કર્મચારીઓ અને પરિવારની મહિલાઓએ ચક્કાજામ કરી તેની માંગ બુલંદ કરી હતી જેને લઈને ટ્રાફિકનાં દ્રશ્યો સર્જાયા હતા.

• પાટણમાં પોલીસ કર્મચારીઓ હાઇવે પર ચક્કાજામ કર્યો
• પોલીસના ઉચ્ચ અધિકારીઓ હાઈવે ઉપર દોડી આવ્યા
• પોલીસ કર્મચારીઓને સમજાવી હાઇવે ખુલ્લો કરાયો

પાટણ : ગ્રેડ-પે ના મુદ્દે પાટણમાં આંદોલન વેગવંતુ બન્યું છે આજે મંગળવારે બપોરે પોલીસ પરિવારની મહિલાઓએ થાળી વેલણ સાથે ઘંટરાવ કરી ધરણા યોજી ગ્રેડ-પે વધારાની માગણીને બુલંદ કરી હતી. ત્યારબાદ રાત્રીના ૯ વાગ્યે પાટણ શહેરનાં પોલીસ કર્મચારીઓ અને મહિલાઓ નવજીવન ચાર રસ્તા ઉપર મોટીસંખ્યામાં એકઠા થઇ ધરણા પર બેસી જઇ હાઇવે ચકકાજામ કર્યો હતો.

પોલીસનાં ઉચ્ચ અધિકારીઓએ આવી કર્મચારીઓને સમજાવી ટ્રાફિક ખુલ્લો કર્યો હતો.

અડધી કલાક સુધી હાઇવે પર ચક્કાજામ રહ્યો

ધરણાનાં કારણે વાહનોથી ધમધમતાં હાઇવે પર વાહનોની લાંબી કતારો લાગી ગઇ હતી. તેની જાણ ઉચ્ચ પોલીસ અધિકારીઓને થતાં તેઓ ઘટના સ્થળે દોડી આવ્યા હતા અને પોલીસ કર્મચારીઓને સમજાવી અંતે હાઇવે ખુલ્લો કરાવ્યો હતો. અડધી કલાક સુધી હાઇવે પર મોટીસંખ્યામાં પોલીસ કર્મચારીઓ બેસી જતાં વાહન વ્યવહાર ખોરવાયો હતો. જેને મહામહેનતે કાર્યરત કરાયો હતો.

આ પણ વાંચો : વિજ જોડાણને લઈને કેશોદના ખેડૂતોએ કરી ઈચ્છામૃત્યુની માંગ

આ પણ વાંચો : સી આર પાટીલની વાત માની હોત તો વૃદ્ધાને રખડતા ઢોરે શીંગડું ન માર્યું હોત, જાણો સમગ્ર ઘટના...