- ઊંઝાના ધારાસભ્ય આશાબેનને અપાઈ અંતિમ વિદાય
- સિદ્ધપુરના મુક્તિધામ આશાબેનના કરાયા અંતિમ સંસ્કાર
- અશ્રુભીની આંખે ભાઈએ મુખાગ્નિ આપી
પાટણ: ઊંઝાના ધારાસભ્ય અને પાટણ હેમચંદ્રાચાર્ય ઉત્તર ગુજરાત યુનિવર્સિટીના (Hemchandracharya North Gujarat University) પૂર્વ સેનેટ સભ્ય, પરીક્ષા સમિતિના પૂર્વ ચેરમેન (Examination Committee Former Chairman) અને વર્ષ 2020માં યુવા વિધાયક એવોર્ડથી સન્માનિત ડો.આશાબેન પટેલનું ડેન્ગ્યુની બીમારીથી અમદાવાદ ખાતે મૃત્યુ થયા બાદ તેમના પાર્થિવ દેહને ઊંઝા ખાતે લાવી APMCમાં લોકોના દર્શનાર્થે મુકવામાં આવ્યો હતો. જ્યાં રાજ્યના મુખ્યપ્રધાન ભુપેન્દ્ર પટેલ સહિતના હજારો લોકોએ પુષ્પાંજલિ અર્પણ કરી હતી.
તેમના ભાઈએ અશ્રુભીની આંખે મુખાગ્નિ આપી
સોમવારે સવારે તેમની અંતિમયાત્રા હજારોની માનવમેદની વચ્ચે નિકળી હતી. જે ઊંઝાથી માદરે વતન વિસોળ અને ત્યાંથી સિધ્ધપુર સરસ્વતી મુક્તિધામ ખાતે લાવવામાં આવી હતી. જ્યાં રાજ્યના પૂર્વ મુખ્યપ્રધાન વિજય રૂપાણી, GIDCના ચેરમેન બલવંતસિંહ રાજપૂત, મોરબીના ધારાસભ્ય અને પૂર્વ પ્રદેશ ભાજપ મહામંત્રી કે.સી પટેલ, સિધ્ધપુર ધારાસભ્ય ચંદનજી ઠાકોર સહિતના ધારાસભ્યોએ રાજકીય અને સામાજિક આગેવાનોની ઉપસ્થિતિમાં ચંદનના લાકડા પર તેમના પાર્થિવ દેહને મૂકી તેમના ભાઈએ અશ્રુભીની આંખે મુખાગ્નિ આપી હતી.
પૂર્વ મુખ્યપ્રધાન વિજય રૂપાણીએ આશાબેન પટેલને શ્રદ્ધાંજલિ અર્પણ કરી
સિદ્ધપુર મુક્તિ ધામ ખાતે રાજ્યના પૂર્વ મુખ્યપ્રધાન વિજય રૂપાણીએ આશાબેન પટેલને શ્રદ્ધાંજલિ અર્પણ કરીને જણાવ્યું હતું કે, ભારતીય જનતા પાર્ટીએ એક નીડર સ્પષ્ટવક્તા મહિલા આગેવાન ગુમાવ્યા છે. વિધાનસભામાં તેઓ પોતાના મત વિસ્તારના વિકાસ માટે સચોટ રજૂઆતો કરી સરકાર પાસે વિકાસ લક્ષી નિર્ણય કરાવતા હતા પોતે ઉચ્ચ શૈક્ષણિક લાયકાત ધરાવતા હોય તેઓ શિક્ષણ લક્ષી કાર્યોમાં વિશેષ રુચિ ધરાવતા હતા. ભાજપમાં પ્રવેશ કર્યા બાદ પક્ષને વફાદાર રહી પાર્ટીના પ્રચાર-પ્રસાર માટે મહિલાઓમા મોટું યોગદાન આપ્યું છે, તેઓના અવસાનથી ભાજપ અને ઊંઝા મતવિસ્તારને એક સક્ષમ આગેવાનની ખોટ પડશે.
આ પણ વાંચો: Life Journey of Ashabahen Patel: ઊંઝાના ધારાસભ્ય ડોકટર આશાબહેન પટેલની જીવન સફર
આ પણ વાંચો: ધારાસભ્ય આશાબેન પટેલનાં નિધન પર વડાપ્રધાન મોદી, ગૃહપ્રધાન શાહ સહિત અગ્રણી નેતાઓએ અર્પી શ્રદ્ધાંજલિ
