પાટણમાં ખોદકામ દરમિયાન ભોંયરું મળ્યું, લોકોમાં બન્યો ચર્ચાનો વિષય

પાટણ: શહેરની નગરપાલિકા કેમ્પસ ખાતે ચાલી રહેલા ખોદકામ દરમિયાન ધરતીમાં ધરબાયેલું ભોંયરૂ મળી આવ્યું છે. આ ભોંયરામાં 3 રસ્તાઓ ક્યાં નીકળતા હશે તે એક જાણકારી સાથે ચર્ચાનો વિષય બન્યો છે.

પાટણ નગરપાલિકાના નવા મકાન માટે હાલ ખોદકામ ચાલી રહ્યું છે. ત્યારે મજૂરો ખોદકામ કરી રહ્યાં હતાં તે દરમિયાન ધરતીમાં ધરબાયેલું એક ભોંયરૂ મળી આવતા આ ભોંયરાને જોવા લોકો નગરપાલિકામાં ધસી આવ્યા હતા. 15 ફૂટ જેટલા ઊંડા આ ભોંયરામાં 3 રસ્તાઓ જતા હોય તેવું પ્રાથમિક ધોરણે લાગી રહ્યું છે. નગર પાલિકા ખાતે મળી આવેલા આ ભોંયરાને લઈ લોકોમાં અનેક ચર્ચાઓ થઈ રહી છે.

પાટણ નગરપાલિકાએ આ ભોંયરા અંગેની કોઈ જાણ પુરાતત્વ વિભાગને કરી નથી. આ ભોંયરૂ જુના સમયમાં પાણી સંગ્રહ કરવા માટેનું મોટું ટાકું હોય તેવું નગરપાલિકાના સત્તાધીશો માની રહ્યા છે.