પંચમહાલના કાલોલ તાલુકાના સણસોલી ગામના પાણી મુવાડીની સીમમાં રહેતા ભારતસિંહ હિંમતસિંહ રાઠોડ પોતાના 2 પુત્રો અને પત્ની સાથે ખેતી કરી પરિવારનું ગુજરાન ચલાવે છે.ભારતસિંહનો મોટા પુત્રના લગ્ન થઈ ગયેલા હોવાથી ગામમાં આવેલા મકાનમાં પોતાના પરિવાર સાથે રહેતો હતો.ખેતરમાં આવેલા મકાનમાં ભારતસિંહ પોતાના કુંવારા 2 પુત્રો દિલીપ અને બુધેસિંહ અને પત્ની કૈલાસબેન સાથે રહે છે.તેમના ખેતરથી જ એકાદ ખેતર જેટલા અંતરે અર્જુનભાઈ પર્વતભાઈ રાઠોડ પોતાની પત્ની વીણાબેન અને પુત્ર રાજેશ સાથે રહે છે.
થોડા મહિના પહેલા ભારતસિંહના વચેટ પુત્ર દિલીપ સાથે બાજુના ખેતરમાં રહેતા અર્જુનની પત્ની વીણા સાથે આડા સંબંધમાંના વહેમમાં બંને પરિવાર વચ્ચે ઝઘડો થયો હતો. જેમાં અર્જુને દિલીપ અને તેના પિતા ભારતસિંહને માર માર્યો હતો અને પોલીસ ફરિયાદ કરશે તો જાનથી મારી નાખવાની ધમકી પણ આપી હતી. જે તે સમયે તો આ ઝઘડો મારામારી પૂરતો સીમિત થઈ ગયો હતો.
અર્જુન રાઠોડને વહેમ હતો કે પોતાની પત્ની વીણા ભારતસિંહના પુત્ર દિલિપ સાથે પ્રણય ફાગ રમી રહી છે. જેથી અર્જુને આ પ્રેમસંબંધનો અંત લાવવા માટે હત્યા માટે કાવતરુ રચ્યુ હતુ. ગત 21 જુલાઈની રાત્રીના જયારે ભારતસિંહ રાઠોડ પોતાના પરિવાર સાથે પોતાના ઘરે આરામ ફરવામી રહ્યા હતા, ત્યારે અર્જુન રાઠોડના ખેતરમાંથી બૂમો સાંભળતા તપાસ કરતા અર્જુન રાઠોડ તેની પત્ની વીણા અને તેમનો પુત્ર રાજેશ પોતાના પુત્ર દિલીપને કુહાડી અને લોખંડના સળિયાથી ઢોર માર મારી રહ્યા હતા.અચાનક ભારતસિંહને આવેલા જોઈ તેમના પર પણ હુમલો કરતા તેમને ભગાડી મુક્યા હતા.
આ સમગ્ર મામલે બાદમાં સમગ્ર મામલે ભારતસિંહે પોતાના મોટા પુત્ર અને કુટુંબના સભ્યોને આ સમગ્ર બાબતે જાણ કરી હતી.સવારે અંદાજિત 7 વાગ્યાના અરસામાં નારણપુરાના રહીશએ ફોન કરી જણાવ્યું હતુ કે તમારો પુત્ર દિલીપ લોહી લુહાણ હાલતમાં નારણપુરા ગામની નર્મદા કેનાલ નજીક આવેલ સીમમાં છે.તાત્કાલિક ઘટના સ્થળે પરિવારજનો સાથે પહોંચતા ત્યાં રોડની બાજુમાં લોહી લુહાણ હાલતમાં દિલીપની અર્ધનગ્ન મૃતદેહ પડયો હતો.
આ સમગ્ર ચકચારી ઘટનાની જાણ કાલોલ પોલીસને કરતા પોલીસે તાત્કાલિક ઘટના સ્થળે દોડી આવી દિલીપના મૃતદેહને પોસ્ટમોર્ટમ માટે મોકલી આપ્યો હતો,પ્રાથમિક તપાસમાં હત્યા જ હોવાનું જણાઇ આવતા FSL અને ડોગ સ્કોડની મદદ લઈ આરોપીઓનુ પગેરુ શોધી કાઢવાના ચક્રો ગતિમાન કર્યા હતા.દરમ્યાન મૃતકના પિતાની ફરિયાદમાં હત્યાનો આક્ષેપ અર્જુન રાઠોડ અને તેના પરિવાર પર કરતા કાલોલ પોલીસે શોધખોળ આરંભી ગણતરીના કલાકોમાં જ સણસોલી ગામની સીમમાંથી આરોપી પરિવાર ઝડપાઇ ગયો હતો.
આરોપીઓની પ્રાથમિક પૂછપરછમાં જ ચોંકાવનારો ખુલાસો થયો હતો કે અર્જુન રાઠોડ અને તેના પરિવારે દિલીપની તેમના નજીકના ખેતરમાં જ હત્યા કરી નાખી હતી અને પુરાવાનો નાશ કરવા માટે નર્મદા કેનાલ નજીક આવેલા નારણપુરા ગામની સીમમાં દિલીપની હત્યા કરેલો મૃતદેહ અર્ધનગ્ન હાલતમાં ફેંકી દીધો હતો.કાલોલ પોલીસે હાલ હત્યા કરવામાં વપરાયેલ કુહાડી અને લોખંડનો સળિયો અને અન્ય મુદ્દામાલ કબ્જે લઈ આરોપીઓ વિરુદ્ધ હત્યા,પુરાવાઓનો નાશ કરવા અંગેની કાયદાકીય કલમો હેઠળ અર્જુન રાઠોડ અને તેની પત્ની વીણા અને પુત્ર રાજેન્દ્ર વિરુદ્ધ ગુનો નોંધી વધુ તપાસ હાથ ધરવામાં આવી હતી.
