મોરવા હડફ ખાતે આવેલા સ્ટેટ બેંકના પ્રાંગણમાં સોમવારે પંચમહાલ જિલ્લા માજી સૈનિક સંગઠનની મિટિંગ મળી હતી. દેશની રક્ષા કરતા સૈનિકો પોતાની માગણીઓને લઈને આંદોલન કરી રહ્યા છે. મોરવા હડફ ખાતે સોમવારે ગુજરાત માજી સૈનિક સંગઠનના પ્રમુખ જીતેન્દ્રની આગેવાની હેઠળ એક મિટિંગનું આયોજન કરવામાં આવ્યું. જેમાં મોટી સંખ્યામાં માજી સૈનિકો તેમજ શહીદ થયેલા સૈનિકોની પત્ની અને પરિવારજનો હાજર રહ્યા હતા.
આ બેઠકમાં પોતાની પડતર માંગણીઓ જેવા કે સરકારી સેવામાં પાંચ વર્ષ ફિક્સ પગાર પ્રથા નાબૂદ કરવામાં આવે છે. ગુજરાત સરકારમાં વર્ગ 1થી 4ની નિમણૂંક વખતે માજી સૈનિકોને નિયમ અનુસાર અનામતનો લાભ આપવામાં આવે, માજી સૈનિકોના પુત્ર તથા પરિવારને નોકરી આપવામાં આવે, જીવનનિર્વાહ માટે સરકારી જમીન ખેતી તેમજ પ્લોટમાં આપવામાં આવે જેવી વિગેરે માંગણીઓ કરવામાં આવી હતી.
ત્યારબાદ એક રેલીનું આયોજન કરવામાં આવ્યુ હતું અને મામલતદાર જીતેન્દ્ર જયસ્વાલે આવેદનપત્ર આપી પોતાની માંગણીઓની રજૂઆત કરી હતી. મહત્વનું છે કે, આગામી સમયમાં પોતાની માંગણીઓ નહિ સ્વીકારવામાં આવે તો ઉચ્ચ કક્ષાએ આંદોલન કરવાની ચીમકી પણ ઉચ્ચારવામા આવી હતી. આ કાર્યક્રમમાં મોટી સંખ્યામાં માજી સૈનિકો અને તેના પરિવારો હાજર રહ્યા હતા.
