આ વર્ષે ચીકુના સ્વાદથી સ્વાદ રસિયાઓ રહેશે દૂર, પાકને થયું નુકસાન

નવસારીઃ જિલ્લામાં ચીકુના સ્વાદથી સ્વાદરસિયાઓ દૂર રહેશે એવી સંભાવનાઓ ઉભી થઇ છે. 'ક્યાર' અને 'મહા' નામના વાવાઝોડા અને વરસાદને લઈને ચીકુના પાકને વ્યાપક નુકસાન થતા લાભપાંચમે સહકારી મંડળીઓ દ્વારા ચીકુની ખરીદી થતી હતી. પરંતુ નુક્સાનીના કારણે મંડળીઓનો કારભાર પણ અટકી પડ્યો છે.

સમગ્ર દેશમાં નવસારી જિલ્લાના અમલસાડી ચીકુની ગુણવત્તાને લઈને પ્રખ્યાત બન્યું છે. વધુ વરસાદને કારણે મેં માહિનાનમાં થયેલું સારું ફ્લાવરિંગ ખરી પડ્યું હતું અને તાજેતરમાં આવેલા વાવાઝોડાને કારણે ઉભો પાક જમીન પર પડતા અંદાજીત 10 કરોડ જેટલુ નુકસાન થયાનો અંદાજો સહકારી મંડળીના સંચાલકો માની રહ્યા છે. તો બીજી તરફ લાભપાંચમના દિવસેથી અમલસાડ મંડળીમાં બે થી અઢી હજાર મણ ચીકુની ખરીદી થતી હોય છે.

આ વર્ષે હજુ સુધીમાં માત્ર 500 મણ જેટલા ચીકુ મંડળીમાં પહોંચી શક્યા છે. હવે ફરી ગુણવતા ભેર ચીકુ મંડળીમાં ન આવતા ફરી થોડા સમય માટે યાર્ડ બંધ કરવાનો સમય આવ્યો છે. જેના કારણે ખેડૂતો પર આફત આવી પડી છે. નવેમ્બર-ડિસેમ્બરમાં ચીકુની ખરીદી થાય તો બજારમાં ભાવો સારા મળે છે. એ સમય ગાળા દરમિયાન બીજા ફળો મળતા નથી જેના કારણે ભાવો સારા મળે છે. જ્યારે બીજા ફળોની સિઝન સામે ચીકુના ભાવો બજારમાં ઓછા મળતા ખેડૂતો માટે કપરા ચઢાણો સર કરવા પડશે.