નવસારી : વાંસદા પોલીસે બાતમીના આધારે થોડા દિવસ પહેલાં વીજ કંપનીના વાયરો ચોરતી ટોળકીને ઝડપી પાડી છે. વાંસદા પોલીસે દક્ષિણ ગુજરાત વીજ કંપનીના વાયરો ચોરતી ટોળકીને બાતમીના આધારે પકડી તેમની પાસેથી 2500 મીટર બીજ વાયર જેની અંદાજિત રકમ 92000 તેમજ કુલ મુદ્દામાલ 1,41,000 પણ કબજે કર્યો છે.
વીજ વાયર ચોરી અંગેની અમને ફરિયાદ મળતાંની સાથે જ અમે તપાસ હાથ ધરી હતી. જેમાં અમને ખાનગી બાતમીના આધારે શંકાસ્પદ ઈસમોની પૂછપરછ કરતા તેઓએ સમગ્ર ગુનાની કબૂલાત કરી હતી. જે સંદર્ભે અમે વીજ વાયર સહિત 1,41,000નો મુદ્દામાલ કબજે કર્યો છે...જયદીપસિંહ ચાવડા (પોલીસ સબ ઇન્સ્પેક્ટર, વાંસદા પોલીસ સ્ટેશન )
દક્ષિણ ગુજરાત વીજ કંપનીના વાયર હતાં : શિયાળાની શરૂઆત થવાની સાથે જ ચોર ટોળકીયો દ્વારા ચોરીની ઘટનાને અંજામ આપવાની પણ શરૂઆત થઈ જાય છે. જેમાં વાસદા વિસ્તારના મનપુર ઢાકમાળ કુરેલીયા વિસ્તારમાંથી વીજ વાયર ચોરીની ઘટના સામે આવી હતી. આ સમગ્ર મામલે દક્ષિણ ગુજરાત વીજ કંપનીના નાયબ ઇજનેર જે જે ધનગરેએ અંદાજે 2500 મીટર વીજ વાયર જેની અંદાજિત કિંમત 92000 ની થાય છે તેની ચોરી થઈ હોવાની ફરિયાદ વાંસદા પોલીસ સ્ટેશનમાં નોંધાવી હતી. જેને લઈને વાંસદા પોલીસે પણ તપાસનો ધમધમાટ શરૂ કર્યો હતો.
ગુનાની કબૂલાત કરી : વાંસદા પોલીસના સર્વેલન્સ સ્ટાફને મળેલી બાતમીના આધારે શંકાસ્પદ ઈસમોની પૂછપરછ કરતા તેઓએ સમગ્ર ગુનાની કબૂલાત કરી હતી. જેમાં તેઓએ વીજ વાયરો અલગ અલગ જગ્યાએથી ચોરી કરી હોવાની અને તે વીજ વાયરો મહેશ ગુપ્તા રહે ઉનાઈ તથા આશિષ ગુપ્તા રહે ઉનાઈને વેચાણ કર્યું હોવાનું જણાવ્યું હતું. પોલીસે આ તમામ લોકોને ધરપકડ કરી 1,41,000 રુપિયાનો મુદ્દામાલ કબજે કર્યો છે.
આરોપીઓના નામ : બિપીન પટેલ ( ઢાંકમાળ ગામ) કૃણાલ ગાયકવાડ ( મનપુર ગામ) રોશન કોકણી ( વરજાખણ તાલુકો ડોલવણ) મહેશ ગુપ્તા (ઉનાઈ ગામ) અને આશિષ ગુપ્તા (ઉનાઈ ગામ)
