નવસારીમાં બે જૂથ વચ્ચે અથડામણ, એક પોલીસ કર્મચારી સહિત 4 લોકો ઘાયલ

નવસારી: શહેરની નજીક બાજુમાં આવેલા વિજલપોરમાં થોડા થોડા દિવસે કંઈક ને કંઈક છમકલાઓ થતા હોય છે. સોમવારે રાત્રે બે સમાજના જૂથો વચ્ચે અથડામણ થતા મામલાએ મોટું સ્વરૂપ ધારણ કર્યું હતું અને પથ્થરમારો કરતા એક પોલીસ કર્મી સહિત 4 લોકો ઘાયલ થતા સારવાર માટે નવસારી સિવિલ હોસ્પિટલમાં ખસેડવામાં આવ્યા છે.

વિજલપોર શહેરના વિઠ્ઠલ મંદિર પાસે એક અકસ્માત થયો હતો. જે અકસ્માતે મોટું સ્વરૂપ ધારણ કરતા મામલો બિચક્યો હતો જેમાં 1000 જેટલું ટોળું સામ સામે આવીને પથ્થરમારો કરતા ટોળું બેકાબુ બન્યું હતું.

વિજલપુરની પોલીસથી ટોળું કાબુમાં ન આવતા નવસારી જિલ્લા પોલીસનો કાફલો ઘટના સ્થળે પહોંચીને 25 જેટલા ટિયરગેસ છોડતા ટોળું વિખરાઈ ગયું હતું. સાથે કોઈ અઇચ્છનીય બનાવ ન બને તે માટે રાત્રી દરમિયાન પોલીસને ઘટના સ્થળે તૈનાત કરી હતી. પોલીસે બંને જૂથને સાંભળીને ફરિયાદ લેવાની તજવીજ હાથધરી છે.