નર્મદામાં ફાયર સેફ્ટીને લઈ તંત્રની તવાઈ

નર્મદાઃ શુક્રવારે સુરતમાં થયેલી આગની ઘટના બાદ સમગ્ર ગુજરાતના ટ્યુશન ક્લાસીસમાં તપાસ થઇ રહી છે. ત્યારે નર્મદા જિલ્લા કલેક્ટરે પણ ફાયર સેફ્ટી માટેની તપાસના આદેશ આપ્યા છે.

આ સાથે નગરપાલિકાની ટીમે રાજપીપળાના ટ્યુશન ક્લાસીસમાં ચેકીંગ કરી ફાયર સેફ્ટી છે કે કેમ તે જોતા મોટાભાગના ટ્યુશન ક્લાસીસમાં ફાયર સેફ્ટીનો અભાવ જોવા મળ્યો હતો. જો કે, રાજપીપળાના ટ્યુશન ક્લાસીસો પાસે સેફ્ટી અંગેની NOC નથી કે કોઈ નિયમ પાળ્યા નથી અને શિક્ષણ વિભાગમાં નોંધાયા પણ નથી. જેથી તમામ ટ્યુશન ક્લાસીસ જ્યાં સુધી વિવિધ સરકારી મંજૂરીના મેળવે ત્યાં સુધી બંધ રાખવા આદેશ આપ્યો છે.

જિલ્લા કલેક્ટર આઈ.કે.પટેલની સૂચના બાદ સિવિલ હોસ્પિટલની સાથે રાજપીપળા સહીત તમામ જિલ્લામાં ચેકીંગ હાથ ધરાયું છે. જેમાં ખાસ કરીને જિલ્લાના મુખ્યમથક રાજપીપળામાં કોઈપણ જગ્યાએ ફાયર સેફ્ટી જોવા મળી ન હતી. એક પણ ટ્યુશન ક્લાસીસમાં આવવા જવાનો રસ્તો પણ અલગ હોય તેવું જોવા મળ્યું ન હતું. શહેરના સ્ટેશન રોડ વિસ્તારમાં આવેલી એક 3 માળી બિલ્ડીંગ જો કે બંધ હતી, પરંતુ ત્યાં પણ માત્ર જવાનો અને આવવાનો એક જ માર્ગ હતો અને અન્ય કોઈ પણ સુવિધા ન હતી અન્ય ક્લાસીસમાં કેટલીક જગ્યાએ વિદ્યાર્થીઓ ભણતા નજરે પડ્યા હતા, ત્યાં પણ ફાયરસેફટીની સુવિધાઓ ન હતી. આમ રાજપીપલાના તમામ ટ્યુશન ક્લાસીસ ગેરકાયદેસર ગણાય. હાલ તમામને પાલિકાએ નોટિસ આપી છે કે તાત્કાલિક ટ્યુશનમાં ફાયરસેફટી કીટ અને જરૂરી હવા ઉજાસ વાળો ક્લાસ, સાથે ટ્યુશન ક્લાસની જગ્યા અને સ્થાનિકોને કોઈ વાંધો નથી, આ તમામ બાબતો ના પુરાવા સાથે NOC મેળવી વિદ્યાર્થીઓની સંખ્યા પણ દર્શાવવી સહિતની માહિતી માંગી છે. શિક્ષણ વિભાગ કે પાલિકાની કોઈ ટ્યુશન સંચાલકે પરવાનગી મેળવી નથી. માટે તમામ ટ્યુશન ક્લાસીસો પર હાલ તંત્રે તવાઈ બોલાવી છે.

રાજપીપળાના નગરપાલિકા પ્રમુખ જીગીશાબેન ભટ્ટે જણાવ્યું કે, “રાજપીપળામાં કોઈપણ ટ્યુશન ક્લાસીસ વાળાએ ફાયર અંગેની કોઈપણ NOC લીધી નથી અને પાલિકામાં ટ્યુશન કરતા હોય તે અંગેની જાણ પણ કરતા નથી. તેને કારણે જ અમે આજે સમગ્ર રાજપીપળામા ટ્યુશન ક્લાસ, હોટલો અને બિલ્ડિંગમાં તપાસ કરી રહ્યા છીએ અને સેફ્ટી અંગે કોઈ સુવિધા ન હોય તો નોટિસ ફટકારી છે.”