નર્મદા ડેમ ખુલ્લો મુકાયા બાદ ત્યાંનો નજારો જોવા માટે લોકોએ ટિકિટના પૈસા ખર્ચ કરવા પડતા હતાં. શરૂઆતમાં ખૂબ જ ઓછો ચાર્જ લેવાતો હતો. 5 રૂપિયાની ટિકિટથી શરૂ થયેલો ભાવ વધતાં-વધતાં 10, 20 અને બાદમાં 350 રૂપિયા કરી દેવાયો હતો.
સ્ટેચ્યુ ઓફ યુનિટિના લોકાર્પણ બાદ ટિકિટના ભાવોમાં સૌથી વધુ વધારો કરાયો હતો. જેથી ડેમ જોવા માટે પ્રવેશ ટિકિટ 350 અને ત્યાં સુધી જવા માટેના 30 રૂપિયાના હિસાબે એક યાત્રિકે 380 રૂપિયા ખર્ચ કરવા પડતા હતા. બીજીતરફ સ્ટેચ્યુ ઓફ યુનિટિની ટિકિટ પણ 150 રૂપિયા છે. જેથી એક પ્રવાસીને 500 રૂપિયાથી વધુ તો ટિકિટમાં જ ગુમાવવા પડતા હતાં.
આ સમયે 11 ઑગસ્ટથી તંત્ર દ્વારા નર્મદા ડેમની ટિકિટ ઘટાડી દેવામાં આવી છે. હવે, આ ટિકિટમાં ઘટાડો કરી ફક્ત 50 રૂપિયા કરી દેવાયો છે. ઉપરાંત પ્રવાસીને એસી બસમાં નર્મદા ડેમના વ્યૂપોઈન્ટ નંબર 3 સુધી લઈ જશે.
આ જાહેરાત થતાં જ પ્રવાસના શોખીનો ખુશખુશાલ થઈ ગયા છે. લોકોએ આ મુદ્દે પ્રતિક્રિયા આપતા નિર્ણયને વધાવી લીધો છે. તેમજ આગામી સમયમાં પ્રવાસીઓમાં વધારો થશે તેવી શક્યતાઓ વ્યક્ત કરી છે.
