મોરબીમાં જગતનો તાત ફરી રોડ પર, હળવદ માર્કેટીંગ યાર્ડ પાસે ચક્કાજામ

મોરબીઃ મોડલ સ્ટેટ ગુજરાતમાં ખેડૂતોની કેવી દયનીય સ્થિતિ છે તેના અનેક ઉદાહરણો જોવા મળતા રહે છે. પાક વિમા સહિતના મુદ્દે ખેડૂતો અવાર-નવાર રોડ પર ઉતરી આવતા હોય છે તેમજ કૃષિ જણસના ભાવો ન મળતા જગતનો તાત દુઃખી બન્યો છે. હળવદ યાર્ડમાં વરીયાળીના ભાવો અચાનક ઘટી જતા ખેડૂતોએ ચક્કાજામ કરી વિરોધ નોંધાવ્યો હતો.

હળવદ માર્કેટિંગ યાર્ડમાં હાલ વરીયાળીની ખરીદી કરવામાં આવી રહી છે જેમાં ગત સપ્તાહના અંતે રૂ 1300 ખરીદીનો ભાવ હતો. જોકે સોમવારે સવારે માર્કેટિંગ યાર્ડ ખાતે ખેડૂતો વરીયાળી લઈને પહોંચ્યા ત્યારે ભાવ રૂ 1300 ને બદલે રૂ 900 જ હોવાનું જાણ થતા ખેડૂત મુશ્કેલીમાં મુકાયો હતો અને કૃષિ જણસનો પૂરો ભાવ ન મળે તો ખેડૂત દેવાદાર બની જાય જેથી ખેડૂતોમાં રોષ ફાટી નીકળ્યો હતો.

વરીયાળીના ભાવ અચાનક ઘટી જતા હળવદ હાઈવે પર આવેલા માર્કેટિંગ યાર્ડ નજીક ખેડૂતોએ વાહનો રોકી ચક્કાજામ કરી વિરોધ નોંધાવ્યો હતો.