મોઢેરા ખાતે આવેલા વિશ્વ વિખ્યાત સૂર્ય મંદિરના સાનિધ્યમાં નૃત્યકલા અને સંસ્કૃતિના સમન્વય એવા ઉત્તરાર્ધ મહોત્સવ-2020નો પ્રારંભ મુખ્યપ્રધાન વિજયભાઈ રૂપાણી દ્વારા કરવામાં આવશે. જેમાં ધરતી પરના સાક્ષાત દેવતા સૂર્યનારાયણ દેવની ઉપાસના માટે સંગીત અને નૃત્ય થકી સંસ્કૃતિની ઝલક છલકાશે.
આ સૂર્યમંદિરમાં દર વર્ષે રાજ્ય સરકાર દ્વારા ઉત્સવનું આયોજન કરવામાં આવે છે, ત્યારે મોઢેરા સૂર્યમંદિર ખાતે રાજ્ય સરકાર દ્વારા ૧૯૯૨ના વર્ષથી ઉત્તરાર્ધ મહોત્સવનું આયોજન કરવામાં આવે છે. જેમાં રમત-ગમત, સાંસ્કૃતિક પ્રવૃતિઓ વગેરેનું જિલ્લા વહીવટીતંત્ર દ્વારા આયોજન કરવામાં આવે છે. આ વર્ષે પણ કરવામાં આવ્યુ છે. આ મહોત્સવની ઉજવણી કરવામાં આવતા સાંસ્કૃતિક વારસો અને કલાને જીવંત રાખી શકાય છે.
સૂર્યમંદિરને દુલ્હનની જેમ સજાવાવમાં આવ્યું છે. જેના પ્રાંગણમાં રાજ્યના સરકારના મંત્રીઓ, સાંસદ સભ્યો, ધારાસભ્યો, મહેસાણા જિલ્લા કલેક્ટર અને વહીવટી તંત્રની ઉપસ્થિતિમાં દ્વિદિવસીય ઉત્તરાર્ધ મહોત્સવનો ઉજવણી કરવામાં આવશે. આ મહોત્સવમાં દેશના વિવિધ રાજ્યો સહિત પ્રદેશના વિવિધ નામાંકિત કલાકારો કલા અને સંસ્કૃતિનું રસપાન કરાવશે.
આ સૂર્યમંદિર સૂર્ય અને ગ્રહોની સ્થિતી તથા સૂર્યના પૃથ્વી ભ્રમણના આદિકાળના ઇજનેરી કૌશલ્યનું ઉત્કૃષ્ટ ઉદાહરણ છે. ભારતીય શાસ્ત્રીય નૃત્યોની ભવ્ય-ગુરૂ શિષ્ય પરંપરાનો પરિચય લોકોમાં વ્યાપક બને તે હેતુથી આ ઉત્તરાર્ધ ઉત્સવની મોઢેરા સૂર્યમંદિર પરિસરમાં ૧૯૯રથી ઉજવણી કરવામાં આવે છે.
ઉત્તરાર્ધ ઉત્સવ ર૦ર૦માં આ વર્ષે પ્રથમ દિવસે ર૧ જાન્યુઆરીએ ગૌરવ પુરસ્કૃત કલાકાર ભરત બારીયા, અક્ષય પટેલ અને કલાગુરૂ શીતલ બારોટની ગણેશવંદના તથા સુધાજી ચંન્દ્રન ભરતનાટયમ્, ગ્રેસીસીંગજી ઓડીસી, કેવી સત્યનારાયણ કુચીપુડી બેલે, વિનિતા નંદન મોહીની અટ્ટમ, મોહેંતી ઓડીસી નૃત્યો પ્રસ્તુત કરશે.
આ નૃત્યોત્સવના બીજા દિવસે 22 જાન્યુઆરીએ ગૌરવ પુરસ્કૃત કલાગુરૂ શીતલ મકવાણાની ગણેશ વંદના, પૂર્ણિમા અશોક ભરત નાટ્યમ્, વૈશાલી ત્રિવેદી કથ્થક, જયપ્રભા મેનોન મોહિની અટ્ટમ, સપના શાહ ભરત નાટયમ્, અલોકા કાનુંગો ઓડીસી અને દેવેન્દ્ર મંગલમુખી કથ્થક લખનઉ ઘરાના નૃત્ય રજૂ કરી શાસ્ત્રીય નૃત્ય કલાનું રસપાન કરાવશે. આ ઉત્તરાર્ધ ઉત્સવમાં રમત-ગમત યુવા સાંસ્કૃતિક બાબતોના રાજ્યપ્રધાન ઇશ્વરસિંહ પટેલ તેમજ મહિલા બાળકલ્યાણ વિભાવરીબહેન દવે પણ ઉપસ્થિત રહેશે.
ત્રણ ભાગમાં નિર્મિત આ મંદિરમાં સૂર્યકુંડ, સભામંડપ અને નૃત્ય મંડપમાં રામાયણ મહાભારતના કથાનક શિલ્પો તેમજ કૃષ્ણલીલા અને સુંદર સ્ત્રી શિલ્પો કંડારવામાં આવેલા છે. ભારતમાં કોર્ણાક, મંદસૌર, લાટપૂર અને કાશ્મીરમાં માર્તંડ સૂર્યમંદિરો સાથે ગુજરાતના આ મોઢેરા સૂર્યમંદિરનું પણ સૂર્યોપાસના માટે અદકેરૂં મહત્વ છે
