કોરોના રસી માટે લિસ્ટ તૈયાર, હવે રસીની રાહ: નીતિન પટેલ

ભારત સરકાર દ્વારા કોરોના સામેની જંગમાં દેશના અલગ અલગ જગ્યાએ કોરોનાની રસી બનાવવાનું કામ ચાલી રહ્યું છે અને દેશના લોકોને જલ્દીથી કોરોનાની રસી મળી જાય તે પ્રકારે પ્રયત્નો હાથ ધરવામાં આવ્યા છે, ત્યારે રાજ્યના લોકોને કોરોનાની રસી આપવા બાબતે આરોગ્ય પ્રધાન નીતિન પટેલે કહ્યું કે, લિસ્ટ તૈયારી કરી લેવામાં આવ્યું છે, હવે ફક્ત રસીની રાહ જોવામાં આવી રહી છે.

• જાન્યુઆરી કે ફેબ્રુઆરીમાં કોરોના માટે રસીકરણ થવાની શક્યતાઓ.!
• ભારત સરકારની ગાઇડલાઇન મુજબ રસી અપાશે
• કોરોના વેક્સિન માટે પ્રાયોરિટી મુજબ યાદી તૈયાર

મહેસાણાઃ રાજ્યના આરોગ્યપ્રધાન અને નાયબ મુખ્યપ્રધાન નિતીનભાઇ પટેલે કોરોના વેક્સિન માટેની તૈયારીઓ અંગે જણાવ્યું કે, દરેકને તબક્કાવાર વેક્સિન આપવાનું આયોજન કરાનાર છે. આ માટે સરકારે પ્રાયોરીટી યાદી તૈયાર કરી છે અને પોર્ટલ પર યાદી આવી ગઇ છે. હવે વેક્સિનની રાહ જોવાય રહી છે, વેક્સિન આવે એટલે ભારત સરકારની ગાઇડલાઇન મુજબ તબક્કાવાર નાગરીકોને આપવામાં આવશે.

જાન્યુઆરી કે ફેબ્રુઆરીમાં રસીકરણ શરૂ થવાની શક્યતાઓ

નીતિન પટેલે જણાવ્યું કે કેન્દ્રીય આરોગ્યપ્રધાને સંભવત જાન્યુઆરી કે ફેબ્રુઆરીની શરૂઆતમાં ભારતમાં વેક્સીનની શરૂઆત થશે તેમ જણાવ્યુ છે. હાલ ગુજરાતમાં કોરોના વેક્સિન આયોજનમાં આરોગ્ય વિભાગ, વહીવટીતંત્ર, શિક્ષકોને સંયુક્ત રીતે સક્રિય કરી તેેમનો ઉપયોગ કરાઇ રહ્યો છે. તેમ મહેસાણા ખાતે જણાવ્યુ હતું.