ધરોઈ ડેમ 70 ટકા ભરાયો, આગામી વર્ષે નહીં સર્જાય પાણીની તંગી

ધરોઇ ડેમમાં ધીમી ગતિએ નવા નીરની આવક થઈ રહી છે. ધરોઇ ડેમની જળસપાટી 614 ફૂટે પહોંચી ગઈ છે. ઉપરવાસમાં નહિવત વરસાદના કારણે 4444 ક્યૂસેક પાણીની હાલ આવક નોંધાઈ રહી છે. આ સાથે ધરોઇ ડેમમાં ચોમાસાની આ સીઝનમાં કુલ 14 ફૂટ જળસપાટીમાં વધારો નોધાયો છે. ધરોઈ ડેમમાં જળસંપત્તિની વાત કરીએ તો 71 ટકા પાણી છલોછલ ભરાઈ ગયું છે. ડેમમાં 622 ફૂટ પર સો ટકા જળસપાટી ગણવામાં આવે છે. તેથી હાલમાં 29 ટકા ડેમ ખાલી છે. જોકે નવા નીરની આવકથી આગામી વર્ષ માટે ડેમમાં જરુરી પાણી ઉપલબ્ધ થઈ ગયું છે.

મહેસાણાઃ મહેસાણા જિલ્લા સહિત ઉત્તર ગુજરાતના ખેડૂતો માટે જીવાદોરી સમાન ધરોઈ જળાશયમાં ચાલુ ચોમાસાની સીઝનમાં નવાનીરની આવક થતાં ડેમ 71 ટકા પાણીથી ભરાયો છે તો હાલમાં ઉપરવાસમાં નહિવત વરસાદને પગલે ડેમમાં પાણીની આવક ઘટી રહી છે.

ધરોઈ ડેમ 70 ટકા ભરાયો

મહેસાણા જિલ્લાના સતલાસણા તાલુકામાં આવેલ ધરોઈ ડેમ ચાર જેટલા જિલ્લાના ખેડૂતોને સિંચાઈ સહિત શહેરી અને ગ્રામ્ય વિસ્તારના નાગરિકોને પીવાના પાણી પુરા પાડવામાં મહત્વની ભૂમિકા ભજવે છે. ત્યારે ગત ઉનાળામાં આ ડેમની જળ સપાટી તળીયે બેઠી હતી. ત્યાં લોકોની ચિંતામાં વધારો થયો હતો. જોકે ચાલુ વર્ષે ચોમાસુ સારું રહેતાં ધરોઈની 13 ફૂટ ઉપરાંત જળસપાટીમાં વધારો નોંધાયો છે. જે જોતાં ડેમમાં હાલમાં 70 ટકાથી વધુ પાણીનો સંગ્રહ જોવા મળી રહ્યો છે. હાલમાં ઉપરવાસમાં વરસાદની ગતિ ધીમી પડતાં ડેમમાં 4000 ક્યુસેક જેટલી પાણીની નહિવત આવક નોંધાઇ છે. જોકે ડેમ 70 ટકા પાણીથી છલોછલ ભરાતાં આગામી જૂન 2021 વર્ષ સુધી ધરોઈ ડેમ આધારિત વિસ્તારમાં પાણીની અછત નહીં સર્જાય તે હાલના સંજોગે સ્પષ્ટ થઈ રહ્યું છે. તો હજુ પણ સારો વરસાદ થાય અને ધરોઈ ડેમ તેની મહત્તમ જળ સપાટી 622 ફૂટે પહોંચી 100 ટકા ભરાય તેવી સૌ કોઈ આશા સેવી રહ્યાં છે.