વિસનગરમાં રહેતા એક નિવૃત સરકારી અધિકારી સાથે ફેસબુક પર મિત્રતા કેળવી વિશ્વાસ જીતી એક ઠગબાજ ટોળકી દ્વારા CBIની ઓળખ આપી જુદા-જુદા એકાઉન્ટમાં 75 લાખ 60 હજાર જેટલી મત્તા ઓનલાઈન ટ્રાન્જેક્શન કરી લૂંટી લેતા સમગ્ર મામલે વિસનગર શહેર પોલીસ મથકે ફરિયાદ નોંધવામાં આવી હતી.
જેને પગલે મહેસાણા સાયબર ક્રાઈમ સેલ અને વિસનગર શહેર પોલીસે સઘન તપાસ હાથ ધરતા લાખોની રકમ ઓનલાઈન ટ્રાન્સફર થવા મામલે તપાસનો છેડો દિલ્હી સુધી લંબાયો હતો. જેને પગલે દિલ્હીમાં આવેલા ઈ-કોમર્સ સાયબર સોલ્યુશન પોઇન્ટમાંથી નાણાં સ્વાઈપ થયાનું સામે આવ્યું હતું .સાથે જ આસપાસની દુકાનોના સ્વાઈપ મશીનમાંથી પણ સ્વાઈપ કરી પૈસા ટ્રાન્સફર કરવામાં આવ્યા હતા. આમ પોલીસે સ્થળ પરથી દિલ્હી પોલીસની મદદ દ્વારા બે નાઈઝીરીયન અને એક મહિલા સહિત 5 ઠગબાજોને ઓનલાઈન ઠગબાજીના કાળા કારોબારમાં ઝડપી લીધા છે.
દિલ્લીમાં ઠગબાજો દ્વારા જે POS મશીનથી પૈસા ટ્રાન્સફર કરાતા તેં શોધી કાઢવામાં આવ્યું છે, જેના આધારે એવી હકીકત સામે આવી કે ઠગબાજો ઇલેક્ટ્રોનિક્સ ઉપકરણો દ્વારા ઠગબાજીનો એવો કીમિયો અપનાવતા કે કોઈ તેમને પકડી ન શકે. જે માટે તો બેન્કમાંથી કોઈ KYC વગર POS મશીન ઉપયોગ કરતા અને બાદમાં ATMથી તે જ પૈસા પોતે ઉઠાવી લેતા આમ પોલીસે 5 ઠગબાજો સાથે POS મશીન , ડમી સીમકાર્ડ અને મોબાઈલ ફોન સહિતનો મુદામાલ જપ્ત કર્યો છે.
મહેસાણા પોલીસ દ્વારા ભોગ બનનારના રૂપિયા હજુ સુધી પરત લાવી શકી નથી. ત્યારે ગુનો માત્ર ડિટેક્શનથી જ અટકશે કે ફરિયાદીને તેના રૂપિયા પણ પરત મળશે. તે જોવું રહ્યું.
