- નાના સોનેલા ગામે કેનાલમાં ગાબડું પડ્યુ
- કેનાલમાં ગાબડું પડતા ખેતરોમાં પાણી ભરાયાં
- ઘઉં, ચણા, રાયડો, અને મગફળી સહિતના ઉભા પાકને નુકસાન
મહિસાગરઃ જિલ્લાના ખેડૂતોને રવિ પાક માટે સિંચાઈનું પાણી મળી રહે તે માટે કડાણા ડાબા કાંઠાની માઇનોર કેનાલમાંથી સિંચાઈનું પાણી આપવામાં આવી રહ્યું છે. ગુરુવારે સવારે નાના સોનેલાં ગામેથી પસાર થતી કડાણા ડાબા કાંઠા માઇનોર કેનાલમાં મોટું ગાબડું પડતા કેનાલ નજીક આવેલા ખેતરોમાં ઢીંચણ સમાં પાણી ભરાયા છે.
ખેડૂતોના પાકને ભારે નુકસાન
જેથી ખેડૂતો દ્વારા તૈયાર કરાયેલા રવિ પાક જેવા કે ઘઉં, ચણા, રાયડો, અને મગફળી સહિતના ઉભા પાકને નુકસાન થવાની ભીતિ સેવાઇ રહી છે. કેનાલ પર બનાવવામાં આવેલા ઉંચા હેડના કારણે કેનાલમાં ગાબડું પડ્યું હોવાનું ખેડૂતો જણાવી રહ્યા છે.
લુણાવાડાના નાના સોનેલા ગામે કેનાલમાં ગાબડું પડ્યું
