મહીસાગરમાં સાર્વત્રિક વરસાદ, કડાણા ડેમમાં પાણીની આવક વધી

ગુજરાતના અનેક જિલ્લાઓમાં હાલ ભારેથી અતિભારે વરસાદ પડ્યો છે. મહીસાગર જિલ્લામાં ધીમી ધારે વરસાદ વરસી રહ્યો છે. જિલ્લાના કડાણા ડેમના કેચમેન્ટ વિસ્તારમાં તેમજ ઉપરવાસમાં વરસાદ પડવાથી ડેમના જળ સ્તરમાં વધારો થયો છે. જેથી ગુજરાતના 9 જિલ્લાઓને અને સિંચાઇ અને પીવાના પાણી માટે ફાયદો થશે.

મહીસાગર: જિલ્લામાં સાર્વત્રિક વરસાદ પડતાં ગુજરાતના 9 જિલ્લા માટે જીવાદોરી સમાન કડાણા ડેમના જળ સ્તરમાં 24 કલાકમાં 17 ફુટનો ધરખમ વધારો નોંધાયો છે. ડેમનાં ઉપરવાસમાંથી 3 લાખ 269 ક્યુસેક પાણીની આવક થઈ રહી છે.

મહિસાગરમાં સાર્વત્રિક વરસાદ

ડેમનું જળ સ્તર વધતાં ગુજરાતના 9 જિલ્લાઓને સિંચાઈ અને પીવાનું પાણી મળી રહેશે. જિલ્લાના 6 તાલુકામાં જોઈએ તો અત્યાર સુધીમાં જિલ્લાના ખાનપુર તાલુકામાં સૌથી વધુ 6 ઈંચ જેટલો વરસાદ વરસ્યો તો અન્ય તાલુકામાં લુણાવાડામાં 4 ઈંચ, સંતરામપુર તાલુકામાં 3 ઈંચ, વિરપુર તાલુકામાં 2 ઈંચ અને બાલાસિનોર તાલુકામાં 1 ઈંચ વરસાદ નોંધાયો છે.

કડાણા ડેમમાં પાણીની આવક વધી

જિલ્લામાં અત્યાર સુધીમાં એવરેજ વરસાદ બાલાસિનોરમાં 390 મીમી, વીરપુરમાં 425 મીમી, ખાનપુરમાં 444 મીમી, સંતરામપુરમાં 410 મીમી, કડાણામાં 421મીમી, લુણાવાડામાં 508મીમી સાથે સમગ્ર જિલ્લામાં મોસમનો કુલ સરેરાશ વરસાદ 433 મીમી વસ્યો છે. મહીસાગર જિલ્લામાં ધીમી ધારે તો ક્યાંક મુશળધાર વરસાદ વરસી રહ્યો છે. જેના કારણે ખેડૂતમાં ખુશીનો માહોલ જોવા મળી રહ્યો છે.