મહીસાગર: લુણાવાડામાં જિલ્લા કક્ષાના પેન્શન સપ્તાહના કાર્યક્રમનો પ્રારંભ

મહીસાગર: ભારત સરકાર દ્વારા પ્રધાનમંત્રી શ્રમયોગી માનધન યોજના અને પ્રધાનમંત્રી લઘુ વ્યાપારી માનધન યોજના હેઠળ અસંગઠિત શ્રમયોગીઓની નોંધણી કરવા સંદર્ભે પેન્શન સપ્તાહનું આયોજન કરવામાં આવ્યું છે. જેના ભાગરૂપે મહીસાગર જિલ્લા કક્ષાનો પેન્શન સપ્તાહ કાર્યક્રમનો શુભારંભ લુણાવાડા નગરપાલિકા કોમ્યુનિટી હોલ ખાતે કરવામાં આવ્યો.

પંચમહાલ લોકસભા સાંસદ રતનસિંહ રાઠોડ, લુણાવાડાના ધારાસભ્ય જીજ્ઞેશભાઈ સેવક, જિલ્લા પંચાયતના પ્રમુખ મંજુલાબેન ખાટ અને જિલ્લા વિકાસ અધિકારી નેહા કુમારી તેમજ મોટી સંખ્યાની ઉપસ્થિતિમાં પેન્શન સપ્તાહનું આયોજન લાભાર્થીઓની હાજરીમાં કરવામાં આવ્યું હતું.

મહીસાગર જિલ્લામાં પ્રધાનમંત્રી શ્રમયોગી યોજના માટે CSC દ્વારા 16039 લાભાર્થીઓની નોંધણી થઈ ચૂકી છે. ઉપસ્થિત લાભાર્થીઓને આ કાર્યક્રમ દરમિયાન વેબકાસ્ટ દ્વારા શ્રમ અને રોજગાર પ્રધાન સતોષ કુમાર ગંગવાર દ્વારા આ પેન્શન યોજનાને કારણે થનાર લાભ વિશેની માહિતી લાભાર્થીઓને આપવામાં આવી હતી. ઉપરાંત આ કાર્યક્રમ દરમિયાન પ્રધાનમંત્રી લઘુ વ્યાપારી માનધન યોજનાના ઉપસ્થિત લાભાર્થીઓને આ યોજનાના કાર્ડનું વિતરણ પણ કરવામાં આવ્યું હતું