ભૂજ ખાતે જિલ્લા સંકલન સહ ફરિયાદ સમિતિની બેઠક જિલ્લા કલેકટર એમ.નાગરાજનના અધ્યક્ષપદે કોન્ફરન્સ હોલ ખાતે યોજાઇ હતી. આ બેઠકમાં જિલ્લા પંચાયતના પ્રમુખ લક્ષ્મણસિંહ સોઢા વરસાદને કારણે બિસ્માર બનેલો ચિત્રોડથી રાપર સુધીના માર્ગ સુધારણાની કામગીરી તાત્કાલિક હાથ ધરવાની માંગણી કરવા સાથે કીડીયાનગર અને મોડા ૬૬ કે.વી. સબ સ્ટેશનોનું કામ તાત્કાલિક જેટકો દ્વારા પૂર્ણ કરાય તેવી પણ રજૂઆત કરી હતી.
.ગાંધીધામના ધારાસભ્ય માલતીબેન મહેશ્વરીએ સામખીયાળી ખાતેના ટોલટેક્ષમાં સ્થાનિક વિસ્તારના લોકોને મુક્તિ મળવા તેમજ અન્યો પ્રશ્નોનો નિવેડો લઇ આવવા રજૂઆત કરી હતી. ઉપરાંત ગળપાદર બ્રીજ તેમજ પડાણા બ્રીજનું કામ તાત્કાલિક શરૂ કરવા ઉપર ભાર મૂક્યો હતો.
અબડાસાના ધારાસભ્ય પ્રદ્યુમનસિંહ જાડેજા દ્વારા જિલ્લા કલેકટર સમક્ષ ભારે વરસાદને કારણે કચ્છમાં નુકશાન પામેલા વિવિધ માર્ગો, તળાવો, ચેકડેમોના દુરસ્તી કામોની રજૂઆત કરી સંબંધિત વિભાગોને દ્વારા આ કામગીરી ત્વરિત હાથ ધરાય તેવી રજૂઆત કરવા ઉપરાંત અબડાસા, લખપત તાલુકામાં બીઓપી પોસ્ટના રોડ બનાવવા, ગ્રામ વિકાસ વાટીકાના વિકાસકામો વગેરેની રજૂઆત કરી હતી.
જિલ્લા કલેકટર એમ.નાગરાજને પદાધિકારીઓના પ્રશ્નો પરત્વે કાર્યવાહી હાથ ધરવાની સાથે કોઇ અડચણ કે વહીવટી પ્રશ્નો હોય તો તેનું ત્વરિત નિરાકરણ લઇ આવીને સંબંધિત વિભાગોના અધિકારીઓને કામગીરી હાથ ધરવા સૂચના આપી હતી. આ ઉપરાંત અધિકારીઓ સાથેની બેઠકમાં પેન્શનના પ્રશ્નો, સરકારી લેણાં, મતદાર યાદીમાં દરેક વિભાગે પોતાના કર્મચારીઓ દ્વારા વિગતોની ખરાઇ કરી લેવા, પ્લાસ્ટિક પ્રતિબંધ જાહેરનામાની અમલવારી કરાવવા, નગરપાલિકા વિસ્તારોમાં ટ્રાફિક સિગ્નલ ચાલુ કરાવવા તેમજ ટ્રાફિક નિયમનું સરકારી વિભાગોને પણ પાલન કરવા સૂચના અપાઇ હતી.
