કચ્છમાં 66 કે.વી.ના 4 સબ-સ્ટેશનોનું લોકાર્પણ અને 2નું ભૂમિપૂજન કરાયું

કચ્છઃ ગુજરાત એનર્જી ટ્રાન્સમિશન કોર્પોરેશન લિમિટેડ દ્વારા નિર્મિત 66 કે.વી.ના એક સાથે 4 સબ-સ્ટેશનો લોકાર્પણ કરવામાં આવ્યું છે. ઉપરાંત 66 કે.વી.ના 2 સબ સ્ટેશનોનાં ભૂમિપૂજન પણ કરવામાં આવ્યું છે.

સૌ પ્રથમ બુઢારમોરા તથા રાયધણપર 66 કે.વી.ના સબ-સ્ટેશનોનું બુઠારમોરા સ્થિત લોકાર્પણ કરાયું હતું. બાદમાં નાડાપા તથા કાલીતલાવડી ગામે 66 કે.વી. સબ-સ્ટેશનોની ભૂમિપૂજન અને તક્તીનું અનાવરણ કરાયાં બાદ સાંજે માધાપર ખાતેથી ભુજ-ડી-સબ-સ્ટેશન તથા મખણાં સબ-સ્ટશનની લોકાર્પણવિધિ સંપન્ન કરાઇ હતી. આમ, એક જ દિવસમાં 6 સબ-સ્ટેશનો પૈકી 4નું લોકાર્પણ અને 2 નવાં સબ-સ્ટેશનોનું ભૂમિપૂજન વિધિ કરાઇ હતી.

સામાજીક-શૈક્ષણિક પછાત વર્ગોના કલ્યાણ અને પ્રવાસનપ્રધાન વાસણભાઈ આહિરે જણાવ્યું હતું કે, કચ્છમાં ઉદ્યોગો અને ખેતી-ઘરમાં વીજ વપરાશનો વ્યાપ ખૂબ વધ્યો છે. તેમાં પણ કચ્છનાં અંજાર વિધાનસભા વિસ્તારમાં 5-10 કિલોમીટરના અંતરે વીજ સબ-સ્ટેશનો આવેલાં છે, તેવો ગુજરાતમાં કોઇ તાલુકાનો નહીં હોય.

કચ્છ-મોરબી લોકસભાના સાંસદ વિનોદભાઈ ચાવડાએ આ તકે કહ્યું, ગુજરાતની સ્થાપના થઇ ત્યારથી 66 કે.વી.ના 12 અને 33 કે.વી.ના 30 સબ-સ્ટેશન હતા. પરંતુ 2001 પછી તમામક્ષેત્રે માળખાકીય સુવિધામાં ખૂબ વધારો થયો છે. આગામી 2 ઓકટોબરથી તેઓ પદયાત્રા કરી વૃક્ષારોપણના સંદેશ સાથે દોઢ લાખ વૃક્ષોના વાવેતર અને પ્લાસ્ટીક મુક્ત પર્યાવરણ માટે દોઢ લાખ કપડાંની થેલીઓ વિતરણ કરવાનો સંકલ્પ જાહેર કરી દેશ-રાષ્ટ્ર કાજે સંકલ્પમાં સૌને સહભાગી બનવા આહ્વાન કર્યું હતું.

ભુજના ધારાસભ્ય ડો. નીમાબેન આચાર્યએ વિકસી રહેલા માધાપર સહિતના વિસ્તારના લો-વોલ્ટેજના પ્રશ્નોના નિરાકરણ સાથે ખેડૂતોને થતી નુકશાનીમાંથી હવે મુક્તિ મળશે, તેમ જણાવ્યું હતું.