નડિયાદ: અમેરિકામાં રહેતા ગુજરાતીઓ પર અવારનવાર હુમલા થવાની ઘટનાઓ બની રહી છે. ત્યારે આવી વધુ એક ઘટનામાં ગુજરાતી યુવાનનું મોતને ભેટ્યો હતો. મૂળ નડિયાદનો 23 વર્ષીય ઉજાસ મેનગર નામનો યુવાન છેલ્લા ઘણા સમયથી પોતાના પરિવાર સાથે અમેરિકાના નોર્થ કેરોલીના સ્ટેટમાં સ્થાયી થયો હતો. જ્યાં ગ્રીન બોરો સિટીમાં તે રહેતો હતો. જ્યાં 46 દિવસ અગાઉ હુમલો કરી તેના પર ફાયરિંગ કરવામાં આવ્યું હતું.
લૂંટના ઇરાદે ત્રણ રાઉન્ડ ફાયરિંગ: નડિયાદનો યુવાન એન્જિયર પુત્ર ઉજાસ અમેરિકાના નૉર્થ કોરોલીના સ્ટેટ ગ્રીન બોરો સિટીમાં રહેતો હતો. 6 નવેમ્બર રાત્રિના સમયે ઉજાસ નોકરી પરથી કારમાં પાછો આવી રહ્યો હતો. તે સમયે કોઈ અજાણ્યો વ્યક્તિ તેનો પીછો કરી રહ્યો હતો. ઉજાસ કાર પાર્ક કરીને બહાર આવ્યો એટલામાં જ અજાણ્યા વ્યક્તિએ તેને રોક્યો અને પૈસાની માંગણી કરી. બંને વચ્ચે ઝપાઝપી થઈ અને અજાણ્યા શખ્સે રિવોલ્વોરથી ઉજાસના પેટમાં 3 રાઉન્ડ ફાયર કર્યા.
સારવાર દરમિયાન મોત: ઉજાસને પેટના ભાગે ગોળી વાગતા ગંભીર ઇજાઓ પહોંચી હતી. તેને હૉસ્પિટલમાં દાખલ કરવામાં આવ્યો. જ્યાં છેલ્લા 46 દિવસથી તેની સારવાર ચાલી રહી હતી. સારવાર દરમિયાન ગઈકાલે તેનું મોત નીપજ્યું હતું. ઉજાસ અમેરિકામાં વૉલ્વો ટ્રક કંપનીમાં પ્રોડક્ટ મેનેજર તરીકે નોકરી કરતો હતો. ઉજાસના મોતને પગલે તેના પરિવારજનોમાં શોકનો માહોલ જોવા મળી રહ્યો છે.
અવારનવાર ગુજરાતી પર હુમલા: અમેરિકામાં છેલ્લા ઘણા સમયથી ગુજરાતી લોકો પર હુમલા થવાની ઘટનાઓ વધી રહી છે. જેમાં અત્યાર સુધી અનેક ગુજરાતી લોકોના મોત નીપજ્યાં છે. ત્યારે લૂંટના ઇરાદે હુમલો કરી વધુ એક ગુજરાતી યુવાનનું મોત થતાં અમેરિકામાં રહેતા ગુજરાતી લોકોમાં શોક સાથે ભયની લાગણી જોવા મળી રહી છે.
