છેલ્લા એક મહિનાથી જૂનાગઢ જિલ્લા પર મેઘરાજા અવિરત પણે વરસી રહયા છે. જેને કારણે હવે લીલા દુષ્કાળની શક્યતાઓ જોવામાં આવી રહી છે, ત્યારે શનિવારથી ફરીથી વરસાદ ધોધમાર વરસવાનું શરૂ કરી દેતા ખેડૂતોમાં ભારે ચિંતા જોવા મળી રહી છે. ભારે વરસાદને પગલે ચોમાસુ પાક નિષ્ફળ જવાની ભીતિને લઈને ખેડૂતો ચિંતામાં ગરકાવ થઇ ગયા છે.
છેલ્લા એક મહિનાથી જૂનાગઢ જિલ્લાના તમામ તાલુકાઓમાં વરસાદે ધોધમાર ઇનિંગ્સ રમતા ચારેકોર વરસાદી પાણી જોવા મળી રહયા છે. જિલ્લાના વિસાવદર, કેશોદ અને માંગરોળ તાલુકાઓમાં પરિસ્થિતિ વધુ કફોડી બની રહી છે. ખાસ કરીને માંગરોળ અને વિસાવદરમાં વરસાદને કારણે મગફળી અને કપાસનો પાક નષ્ટ થવાને આરે છે. જેને લઈને ખેડૂતોમાં ભારે ચિંતા જોવા મળી રહી છે. અસરગ્રસ્ત ખેડૂતો દ્વારા સરકાર તાકીદે નુકસાન અંગેનો સર્વે કરીને ખેડૂતોને વળતર ચૂકવે તેવી માગ કરી છે.
વિસાવદર તાલુકામા મગફળી અને કપાસનું બહોળા પ્રમાણમાં વાવેતર કરવામાં આવે છે, ત્યારે અવિરત પડી રહેલા વરસાદને પગલે મગફળી કોહવાઈ જતા તાલુકાના મોટા ભાગના ખેતરોમાં પાક નષ્ટ થઇ રહ્યો છે. જયારે કપાસમાં ભેજવાળા વાતાવરણને કારણે જીવાતનો ઉપદ્રવ આવતા તે પણ નષ્ટ થવાને આરે છે. જેને ખેડુતોને પડયા પર પાટુ સમાન માનવામાં આવી રહ્યો છે, જેને લઈને ખેડૂતો સરકાર સમક્ષ રાહતની માગ કરી રહ્યા છે.
