દીવમાં આવતા યુગલો પાસેથી પૈસા પડાવતા 3 લોકોની ધરપકડ

જૂનાગઢ: સંઘ પ્રદેશ દીવમાં હની ટ્રેપની ઘટના સામે આવી છે. દીવમાં વેકેશન માણવા આવેલા એક યુગલને નકલી પોલીસ બનીને બળાત્કારના કિસ્સામાં ફસાવવાના આરોપસર જૂનાગઢના નિલેશ નામના યુવક અને બે કોલગર્લ સહિત ત્રણ લોકોની ધરપકડ કરી અમરેલી જેલ હવાલે મોકલી દેવામાં આવ્યા હતા.

સંઘ પ્રદેશ દીવમાં ચર્ચાસ્પદ કિસ્સો સામે આવ્યો છે. હાલમાં વેકેશનનો માહોલ ચાલી રહ્યો છે, ત્યારે સમગ્ર દેશમાંથી યાત્રિકો દીવ તરફ વેકેશન માણવા અને મનાવવા માટે આવતા હોય છે. ત્યારે આવતા કેટલા ભોળા અને નિર્દોષ લોકોને ફસાવવા માટે કોલ ગર્લ અને કેટલાક યુવાનો સંગઠિત બનીને આવા યુગલોને હેરાન પરેશાન કરી તેમની પાસેથી તોડ કરવાનો ચર્ચાસ્પદ કિસ્સો સામે આવ્યો છે.

જૂનાગઢનો નિલેશ નામનો એક યુવક અને બે કોલ ગર્લ મળીને આ સમગ્ર રેકેટ ચલાવતા હોવાનું બહાર આવ્યું છે. મળતી માહિતી મુજબ દીવની હોટલમાં રોકાણ કરતા યુગલોની પ્રથમ માહિતી મેળવી અને નકલી પોલીસ બનીને યુગલ જે જગ્યા પર રોકાયા હોય ત્યાં જઈને તેમને ડરાવી ધમકાવી અને તેમના પર બળાત્કારનો ગુનો નોંધાવાની ધમકી આપી રૂપિયા પડાવતા હોવાનો કિસ્સો બહાર આવ્યો હતો. જેને દિવ પોલીસે પકડી પાડીને સમગ્ર પ્રકરણ ખુલ્લું પાડ્યું હતું.

પકડાયેલા જૂનાગઢના નીલેશ નામનો યુવક અને બે કોલ ગર્લને અમરેલી સબજેલ ખાતે મોકલી આપવામાં આવ્યા હતા. દીવમાં હનીટ્રેપનો ચર્ચાસ્પદ કિસ્સો પ્રથમ વખત બહાર આવ્યો છે. જેમાં એક યુવક બે કોલ ગર્લનો ઉપયોગ કરીને અહીં આવતા યુગલોને ફસાવવાનો કારસો કર્યો હતો, પરંતુ તેમાં તેને નિષ્ફળતા મળતા હાલ કોલ ગર્લ અને એક યુવક અમરેલી જેલની હવા ખાઇ રહ્યા છે.