જૂનાગઢ પોલીસને મળી ચોર ટોળકીને પકડવામાં સફળતા, મહારાષ્ટ્રમાંથી 6 આરોપી પકડી પાડ્યા

જૂનાગઢઃ પોલીસને રવિવારના રોજ મોટી સફળતા મળી હતી. ગત 17મી તારીખે જૂનાગઢ-રાજકોટ રોડ પર આવેલા ટ્રાન્સપોર્ટના 3 ગોડાઉનમાં ચોરી થયાની પોલીસ ફરિયાદ મળી હતી, જેને પગલે જૂનાગઢ પોલીસે 6 જેટલા આરોપીની બદલાપૂર મહારાષ્ટ્રમાંથી પકડવામાં સફળતા મળી હતી.

છેલ્લા કેટલાક સમયથી જૂનાગઢમાં આવેલા ટ્રાંન્સપોર્ટના ગોડાઉનમાં ચોરી ઘટનાઓ વધી રહી હતી, જેને લઈને જૂનાગઢ પોલીસ પણ ચિંતામાં હતી ત્યારે ગત 17મી તારીખે જૂનાગઢ રાજકોટ રોડ પર આવેલા ટ્રાંન્સપોર્ટના 3 ગોડાઉનમાં ચોરીની મોટી ઘટના સામે આવતા પોલીસ પણ ચોકી ઉઠી હતી. જૂનાગઢ એસપી દ્વારા ચોરીની ઘટનાને લઈને બે અલગ અલગ ટિમો બનાવીને તપાસ હાથ ધરવામાં આવી ત્યારે પોલીસને મળેલી પૂર્વ બાતમીને આધારે જૂનાગઢમાં ચોરીને અંજામ આપીને ફરાર થયેલી ચોર ટોળકી મહારાષ્ટ્રના બદલાપૂર વિસ્તારમાં હોવાની માહિતી મળતા ક્રાઇમ બ્રાન્ચના અધિકારીઓ વેશ બદલીને બદલાપૂર જીઆઈડીસીમાં તપાસ કરતા તમામ 6 આરોપીઓ ઝડપાઈ ગયા હતા.

પક્ડાયેલી ચોર ગેંગના તમામ 6 આરોપીની આગવી ઢબે પૂછપરછ કરવામાં આવતા, આ ગેંગે જૂનાગઢની ચોરીની કબૂલાત આપી હતી અને ચોરીનો મુદ્દામાલ મહેસાણાના કડીમાં રાખવામાં આવ્યો હોવાની જાણકારી આપી હતી. જ્યારે બીજી ટીમને કડી મોકલવામાં આવી હતી, કડીથી જૂનાગઢની ચોરીનો 18 લાખ કરતા વધુનો મુદ્દામાલ તેમાં રાજ્યમાં અલગ અલગ જગ્યાએ કરેલી ચોરીઓનો મળીને કુલ 74 લાખ કરતા વધુનો માલ કબ્જે લેવામા આવ્યો હતો.

જૂનાગઢ પોલીસ દ્વારા મહારાષ્ટ્રના બદલાપૂરમાંથી પકડવામાં આવેલા 6 આરોપી પૈકી 5 ગોધરા અને 1વડોદરાનો હોવાનું બહાર આવ્યું હતું. આ ગેંગ ગુજરાત સહિત અન્ય રાજ્યોમાં પણ ચોરીની ઘટનાને અંજામ આપ્યો હશે જેને લઈને જૂનાગઢ પોલીસ શંકાને આધારે વધુ તપાશ હાથ ધરી છે.