જૂનાગઢમાં ધનતેરસના દિવસે લોકોએ કિંમતી ધાતુઓની ખરીદી કરીને શુકનને સાચવ્યું

જૂનાગઢઃ જિલ્લામાં ધનતેરસનો પાવન પ્રસંગ આજના દિવસે હોય જેથી કિંમતી ધાતુ ખરીદ કરવાની વર્ષો જૂની પરંપરા આજે પણ યથાવત જોવા મળી રહી છે. આજે લોકોએ સોના સહિતની કિંમતી ધાતુની ખરીદી કરીને ધનતેરસને શુભ શુકન કર્યા હતાં.

25/10/2019 શુક્રવાર ધનતેરસનો પાવન પ્રસંગ છે. હિન્દુ શાસ્ત્રમાં આપણી ધાર્મિક પરંપરાઓ મુજબ ધનતેરસના દિવસે કિંમતી ધાતુઓની ખરીદીને શુભ શુકનના રૂપમાં માનવામાં આવે છે. જેને લઈને જૂનાગઢની સોની બજારમાં લોકોએ ધનતેરસના શુભ મુહૂર્તમાં કિંમતી ધાતુઓની ખરીદી કરીને ધનતેરસનુ મુહૂર્ત સાચવ્યું હતું. સોનાને રોકાણના રૂપમાં પણ શ્રેષ્ઠ માનવામાં આવે છે. તેમજ સોનામાં કરેલું રોકાણ સમય વિતતા સારુ આર્થિક લાભ પણ કરાવી શકે છે. જેના પગલે આજના દિવસે લોકોએ સોનાની ખરીદી કરી હતી.

સોનામાં સતત વધી રહેલા ભાવની વાત કરવામાં આવે તો આજથી એક વર્ષ પહેલાં એટલે કે વર્ષ 2018ના ધનતેરસના તહેવારના દિવસે સોનાનો જે ભાવ હતો તે આજના ભાવ કરતાં 6500 રૂપિયા ઓછો હતો, એટલે એવું કહી શકાય કે, ધનતેરસથી ધનતેરસ વચ્ચેના એક વર્ષના સમયગાળા દરમિયાન સોનાના પ્રતિ 10 ગ્રામ ભાવોમાં 6500નો વધારો જોવા મળી રહ્યો છે. હાલ સોનાનો પ્રતિ 10 ગ્રામનો ભાવ 40 હજારની બિલકુલ નજીક પહોંચી ગયો છે. જે આગામી સમયમાં 40 હજારને પાર કરે તેવી પણ શક્યતાઓ છે. તેવુ સોનાના વેપારીઓ વ્યક્ત કરી રહ્યા છે.