એક તરફ ભાજપ સામે જૂનાગઢ મનપામાં સત્તા બરકરાર રાખવા માટેની આકરી કસોટી હશે તો, સામા પક્ષે કોંગ્રેસ ભાજપ પાસેથી જૂનાગઢ મનપા પર સત્તા મેળવવા પ્રયાસ કરશે. ભાજપ અને કોંગ્રેસ બંને રાજકીય પક્ષ જૂનાગઢ મહાનગરપાલિકાની લડાઈમાં સામસામે આવી ગયા છે. જેનું પરિણામ આગામી 23મી તારીખે જાહેર થશે ત્યારે જ ખબર પડશે કે, ભાજપ સત્તા ટકાવી રાખવામાં સફળ થયું કે, કોંગ્રેસ ભાજપ પાસેથી સત્તા મેળવી લેવામાં નસીબવંતી સાબિત થઈ છે.
રાજ્ય સરકાર દ્વારા વર્ષ 2002માં જૂનાગઢને નગરપાલિકા અને મહાનગરપાલિકાનો દરજ્જો આપીને 2002થી 2004 સુધી કમિશ્નર રાજની સ્થાપના કરી હતી. વર્ષ 2004માં પ્રથમ વખત જૂનાગઢ મહાનગરપાલિકાની ચૂંટણીઓ યોજવામાં આવી હતી. જેમાં ભાજપ અને કોંગ્રેસ બંને રાજકીય પક્ષ પ્રથમ વખત બનેલા જૂનાગઢ મહાનગરપાલિકા પર કબજો મેળવવા ચૂંટણી જંગમાં ઉતર્યા હતા, પરંતુ ભાજપની નીતિ અને રણનીતિના પરિણામે જે તે સમયે જૂનાગઢ ભાજપના ધારાસભ્ય મહેન્દ્ર મશરૂને જુનાગઢના પ્રથમ મેયર તરીકે નેતૃત્વ જ્વલંત વિજય પ્રાપ્ત થયો હતો.
વર્ષ 2009માં જુનાગઢ મહાનગરપાલિકાનુ મેયર પદ બીજી ટર્મમાં અનુસૂચિત જાતિ માટે અનામત જાહેર કરવામાં આવ્યું હતું. વર્ષ 2009માં યોજવામાં આવેલી ચૂંટણીઓમાં કોંગ્રેસના સતીશ વિરડા અને લાખાભાઈ પરમાર મેયર પદે આરુઢ થયા હતા અને ભાજપ પાસેથી મહાનગરપાલિકાનું શાસન ખૂંચવી લેવામાં કોંગ્રેસને સફળતા મળી હતી. 5 વર્ષ સુધી જૂનાગઢ મનપામાં કોંગ્રેસે શાસનની ધુરા સંભાળી હતી. ત્યારબાદ વર્ષ 2014માં ફરી જૂનાગઢ મનપા પર ભાજપનો કબજો થયો હતો અને મેયર પદે જીતુભાઈ હિરપરા અને આદ્યશક્તિ બેન મજમુદાર જૂનાગઢના મેયર બન્યા હતા.
ત્યારે હવે ફરી વર્ષ 2019માં જૂનાગઢ મહાનગરપાલિકા માટે ચૂંટણી યોજાઈ રહી છે. 2004થી 2014 સુધીની જૂનાગઢ મહાનગરપાલિકાના રાજકીય ઇતિહાસની વાત કરીએ તો દર 5 વર્ષે જૂનાગઢના મતદારો સત્તા પક્ષને વિપક્ષમાં બેસાડી વિપક્ષને સત્તાપક્ષની જવાબદારીઓ આપતા હોય છે. ત્યારે આગામી 23 તારીખે ચૂંટણીના પરિણામો જાહેર થશે ત્યારે ખબર પડશે કે, જૂનાગઢના મતદારો કેટલા શાણા અને સમજુ છે.
