જૂનાગઢ જિલ્લાના વિસાવદરમાં દીપડાઓના વધતા જતા હુમલાઓ દિવસ દરમિયાન ખેતીની લગતો વીજ પુરવઠો આપવો તેમજ પાક વિમાનો નવો સર્વે કરીને ખેડૂતોને તાકીદે વળતર ચુકવવામાં આવે તેવી માગ સાથે વન વિભાગની કચેરી વિસાવદરમાં ધરણા કર્યા હતા. જેમાં વિસાવદરના ધારાસભ્ય હર્ષદ રીબડીયા અને જૂનાગઢ જિલ્લા ભાજપના પ્રમુખ કિરીટ પટેલ પણ ઉપસ્થિત રહયા હતા.
રાજ્ય સરકાર દ્વારા ખેડૂતોના પ્રશ્નોને લઈને તાકીદે કોઈ નિર્ણય નહીં કરવામાં આવે તો ખેડૂતો અને સરપંચો દ્વારા મોટુ આંદોલનની ચીમકી પણ આપવામાં આવી હતી. વિસાવદર તાલુકાના 74 જેટલા ગામોના સરપંચોએ સંગઠન બનાવીને સરકાર સામે તેમના પડતર પ્રશ્નોને લઈને લડત કરવા માટે આગળ આવ્યા હતા. જેમાં હવે ખેડૂતો પણ જોડયા છે અને સરપંચના સંગઠનને તેમનું સમર્થન પણ આપ્યું હતું. વિસાવદરની વન વિભાગની કચેરીમાં ધરણાનો કાર્યક્રમ કરવામાં આવ્યો હતો, જેમાં જૂનાગઢ જિલ્લા ભાજપ પ્રમુખ કિરીટ પટેલ અને વિસાવદરના કોંગ્રેસના ધારાસભ્ય હર્ષદ રિબડીયાએ ખાસ હાજરી આપીને ખેડૂતોના પ્રશ્નોને લઈને દરેક રાજકીય વ્યક્તિઓ પક્ષને ભૂલીને ખેડૂતોના સમર્થનમાં આગળ આવે તેવી માગ ખેડૂતો દ્વારા કરવામાં આવી હતી.
