વિસાવદર પાસે ખાનગી બસ પલટી મારી, 6નાં મોત

જૂનાગઢઃ વિસાવદર નજીક ખાનગી મીની બસ પલટી જતાં ગંભીર અકસ્માત થયો હતો. જેમાં 6 લોકોના મોત થયા છે. તો અન્ય 20થી વધુ  મુસાફરોને ગંભીર ઈજા પહોંચી છે. જેમને તાત્કાલિક સારવાર માટે સ્થાનિક હૉસ્પિટલમાં ખસેડાયા છે.

સાવરકુંડલા જૂનાગઢ રૂટની ખાનગી બસનો જૂનાગઢના વિસાવદર નજીક અકસ્માત થયો હતો. જેમાં 2 મહિલા અને 4 પુરુષનું ઘટનાસ્થળે મોત થયું હતું. જ્યારે અન્ય 20 કરતા વધુ મુસાફરોને ઈજાઓ થતાં તેમને સારવાર અર્થે હૉસ્પિટલ ખસેડવામાં આવ્યા છે

મળતી માહિતી પ્રમાણે, સાવરકુંડલાથી જૂનાગઢ તરફ આવી રહેલી ખાનગી મીની બસનો ચાલક કોઈ કેફી પીણું પીને બસ હંકારી રહ્યો હતો. જેથી લાલપુર નજીક બસ પરનો કાબૂ ગુમાવતા અકસ્માત સર્જાયો હતો. ઘટનાની જાણ થતાં વિસાવદર પોલીસે અકસ્માતનો ગુનો નોંધી આગળની તપાસ હાથ ધરી હતી.