કુદરતને ન્યાયઃ જામનગરમાં ગણેશ વિસર્જન માટે કુત્રિમ તળાવનું કરાયું નિર્માણ

જામનગરઃ જામનગર મહાનગરપાલિકા દ્વારા ગણેશ વિસર્જન માટે કુત્રિમ તળાવનું નિર્માણ વાલસુરા રોડ પર કરવામાં આવ્યું છે. ખાસ કરીને પર્યાવરણનુ રક્ષણ કરવા તેમજ પ્રદુષણ ન ફેલાય તે માટે ગણેશ વિસર્જન કરવા કુંડનું નિર્માણ કરવામાં આવ્યું છે.

ગુજરાત પોલ્યુશન કંટ્રોલ બોર્ડ અને મહાનગરપાલિકાના સંયુક્ત પ્રયાસથી ૧૩૫ ફૂટ પહોળો ગણેશ વિસર્જન કુંડ બનાવવામાં આવ્યો છે. જે આઠ ફૂટ જેટલી ઉંડાઇ પણ ધરાવે છે. જામનગરવાસીઓ દર વર્ષે બાલાચડી તેમજ રોજી બંદર પર દરિયાકિનારે ગણેશ વિસર્જન કરતા હતાં. જેના કારણે દરિયામાં ભારે પ્રદુષણ થતુ હતું અને લાખો માછલીઓના મોત થતા હતાં.

પર્યાવરણનું જતન થાય તેમજ પ્રદૂષણ અટકાવવાના ઉદ્દેશથી આ સુંદર કુંડનું નિર્માણ કરવામાં આવ્યું છે. આજે ગણેશ વિસર્જનનો છેલ્લો દિવસ હોવાથી શહેરીજનો મોટીસંખ્યામાં પોતાની ગણેશની મૂર્તિઓ લઈ અને વિસર્જન માટે ઉમટી રહ્યા છે.