જામનગર જિલ્લા જેલમાં ઈ-મુલાકાત સુવિધાનો પ્રારંભ કરાયો, કેદીઓ વીડિયો કોલથી પરિજનો સાથે કરી શકશે વાતચીત

લોકડાઉનમાં ભીડ જમા ન થાય અને કોઈ પણ રીતે વાઈરસ ન ફેલાય તે માટે તંત્ર સજ્જ છે. જામનગરની જિલ્લા જેલ પ્રસાશન દ્વારા કેદીઓ અને તેમના પરિવારજનો વચ્ચે ઈ-મુલાકાતની સુવિધા શરૂ કરાઈ છે.

જામનગર : નોવેલ કોરોના વાઇરસ વૈશ્વિક મહામારી અને તેને રોકવાના ભાગરૂપે લાગુ કરાયેલા લોકડાઉનના પરિણામે ભારતભરની જેલોમાં કેદી તરીકે જીવન પસાર કરી રહેલા લોકોને પણ સ્વાભાવિક રીતે સામાન્ય લોકોની જેમ જ વિવિધ પ્રકારની મુશ્કેલીઓનો સામનો કરવો પડતો હોય છે. પરંતુ ભારતીય ન્યાયતંત્ર અને તમામ રાજ્યોના જેલ વિભાગો દ્વારા જેલમાં બંધ બંદીવાનોને જીવવા આવશ્યક વસ્તુઓ માટે સગવડતા રહે અને તેમને કોરોના વાઇરસ મહામારીથી બચાવી શકાય તે બાબતે અથાગ અને અવિરત પ્રયાસો કરવામાં આવી રહ્યા છે. આ પ્રયાસોના ભાગરૂપે ગુજરાત જેલ વિભાગ જેલોના ડાયરેક્ટર અને ઈન્સ્પેક્ટર જનરલ ડૉ.કે.લક્ષ્મીનારાયણ રાવના માર્ગદર્શન હેઠળ વિવિધ પગલાં ભરી બંદિવાનો માટે સગવડતા ઊભી કરી તેમને કોરોના વાઈરસથી બચાવવામાં મોખરે રહ્યું છે.

જામનગર જિલ્લા જેલ ખાતે પણ જિલ્લા જેલ અધિક્ષક નાસિરૂદ્દીન એસ.એલ.ની આગેવાની અને માર્ગદર્શન હેઠળ જિલ્લા જેલ ખાતે બંદીવાનોને આવશ્યક સુવિધા મળી શકે, તેમના માનવાધિકાર સંપૂર્ણ રીતે જળવાઈ રહે અને કોરોના વાઇરસથી બચાવી શકાય તે માટે વિવિધ પગલાઓ જેવા કે, 24x7 મેડિકલ સુવિધા, ક્વોરેન્ટાઇન બેરેકની સુવિધા, આઇસોલેશન બેરેકની સુવિધા, રેગ્યુલર ડિસઇન્ફેકશન ઓફ પ્રિમાઇસીસ, કેદીઓ, સ્ટાફ અને સ્ટાફના પરિવારોનું મેડિકલ સ્ક્રિનિંગ, રૂબરૂ મુલાકાત પર પાબંધી, ટિફિન સુવિધા પર રોક, બંદીવાનોની વચગાળાના શરતી જામીન પર મુક્તિ વગેરે પગલાઓ ખૂબ જ કારગર નીવડ્યાં છે.

વર્તમાન પરિસ્થિતિ અને બંદીવાનોને જરૂરિયાતો અને તેમના અધિકારોને ધ્યાને લઇ જિલ્લા જેલ અધિક્ષક જામનગર દ્વારા કેટલાક વધુ પગલાઓ લઇ સુવિધાઓ ઉભી કરવાનો નિર્ણય કરવામાં આવ્યો. જેમાં મનીઓર્ડરની સેવા, ઇ-મુલાકાત સુવિધા, સેનિટાઇઝેશન બોક્ષ દ્વારા ડિસઇન્ફેકશનના પગલા લેવામાં આવ્યા છે.

જામનગર જિલ્લા જેલમાં ઈ-મુલાકાત સુવિધાનો પ્રારંભ કરાયો

હાલમાં બંદીવાનો માટે પરિવાર સાથે રૂબરૂ મુલાકાતની સુવિધા બંધ કરેલા છે. ત્યારે આ પરિસ્થિતિમાં બંદિવાનો અને તેમના પરિવારજનો એકમેકને નિહાળી શકે અને એકમેકના સ્વાસ્થ્ય સુખમય હોવાનું જાણી શકે તેવા આશયથી ગુજરાત જેલ વિભાગ દ્વારા ”ઇ-મુલાકાત સુવિધા” તમામ જેલોમાં શરૂ કરવામાં આવેલા છે. આ સુવિધાનો લાભ લેવા માટે કેદીઓના વિશ્વભરમાં કોઇપણ જગ્યાએ રહેતા પરિવારજનો/મિત્રોએ પ્રથમ પોતાના મોબાઈલમાં vidyomobile એપ ડાઉનલોડ કરવાની રહેશે. ત્યારબાદ વેબસાઇટ eprisons.nic.in પર emulakat સેક્શનમાં જઇ રજિસ્ટ્રેશન કરાવવાનું રહેશે. મુલાકાત રજીસ્ટર થયા બાદ આ દરખાસ્તને જેલ દ્વારા મંજૂરી અપાતા રજીસ્ટ્રેશન કરનારના મોબાઇલ પર લિંક મોકલાશે. આ લીંક ખોલતા વિડીયોકોલ કનેક્ટ થઇ જશે. આમ આ મહામારીના સમયમાં પરિવારના સ્વાસ્થ્ય અંગે જાણકારી મેળવી લઇ બંદિવાનો પણ ચિંતામુક્ત રહી શકશે.જેલ એ એક ક્લોઝડ પ્રિમાઇસીસ હોઇ તેમાં ઇન્ફેક્ટીંગ એજન્ટ કોઈપણ પ્રકારે ન પ્રવેશે તે માટે તેને રોકવાના વિવિધ પગલાઓ પૈકીનું એક એવું “સેનિટાઇઝેશન બોક્ષ” જામનગર જિલ્લા જેલના પ્રવેશદ્વારે મૂકાયું છે. જેમાંથી ખાસ કરીને ફરજ બજાવવા જતાં સ્ટાફ અને નવા આવતા કેદીઓ પસાર થઈ પોતાને ડિસઇન્ફેક્ટ કર્યા બાદ જ જેલની અંદર પ્રવેશે છે, જેથી જેલની અંદર રહેલા વ્યક્તિઓ પૈકી અન્યને સ્પર્શ કે સંપર્ક કરે તો વાઇરસનું સંક્રમણ ના થાય અને સંક્રમણને જેલમાં ફેલાતું અટકાવી શકાય.જામનગર જિલ્લામાં હાલ 61 કેદીઓને સરકારના આદેશ મુજબ કોવિડ-19ની મહામારીના અનુસંધાને વચગાળાના જામીન આપેલા છે. જામનગર જિલ્લા જેલ ખાતે દસ વર્ષથી પાકા કામના કેદી તરીકે બંદી રહેલ જુનસ દાઉદભાઇ જેલ અધિક્ષક અને ગુજરાત સરકારનો આભાર માનતા કહે છે કે, “ મનીઓર્ડરની સુવિધા મળતા અમે કેન્ટિનમાંથી જરૂરી વસ્તુઓ જેવી કે, દૂધ, છાસ વગેરે લઇ શકીશું સાથે જ આજે ઘણા દિવસે પરિવાર સાથે વીડિયો કોલ પર વાત થઇ પરિવારજનોની તબિયત સારી જાણી ખૂબ આનંદ થયો. આ દરેક સુવિધા માટે ખૂબ આભાર.”

આમ, જામનગર જિલ્લા જેલ કે જેના અધિકાર ક્ષેત્રમાં જામનગર અને દેવભૂમિ દ્વારકા એમ બે જિલ્લાઓ આવે છે ત્યારે આ બંને જિલ્લાના તથા થોડા પ્રમાણમાં રહેલા અન્ય જિલ્લાઓના, રાજ્યના અને દેશના તમામ કેદીઓ કોરોનાથી મુક્ત રહે અને સરળ તેમજ માનવઅધિકારોથી સંપન્ન જીવન ગાળી, સુધારાત્મક વહીવટ થકી શારીરિક તેમજ માનસિક તંદુરસ્ત અને સારા નાગરિક બની સમાજમાં પરત જાય તે માટેના અથાગ અને અવિરત પ્રયાસો જિલ્લા જેલ અધિક્ષકશ્રીની આગેવાની હેઠળ જામનગર જિલ્લા જેલ કરે છે અને કરતું રહેશે.