જામનગર જિલ્લાની COVID-19ની પરિસ્થિતિનો તાગ આપતા કલેક્ટર રવિશંકર

જામનગર જિલ્લાની COVID-19ની અપડેટ આપતા જિલ્લા કલેક્ટર રવિશંકરે જણાવ્યું કે, અત્યારે જામનગર જિલ્લામાં 8 દર્દી સારવાર હેઠળ છે. બાકી બધા દર્દીઓને રજા આપી દીધી છે. અત્યાર સુધીમાં 2 લોકોના મોત થયા છે, જે કોરોનાથી મૃત્યુ પામ્યા છે. હાલમાં એક બાળકનું મૃત્યુ થયુ છે તે કોરોનાનો દર્દી હતો અને સાથે સાથે તે બાળક કેન્સરના રોગથી પણ પીડાતો હતો. આ બાળકનું મૃત્યુ કોરોનાથી નહિ, પરંતુ કેન્સરની બિમારીથી થયું છે. જેનો અમે ગાંધીનગર ખાતે રીપોર્ટ કર્યો છે અને જે અમારા તજજ્ઞ ડોક્ટરો છે તેમણે જાહેર કર્યો છે કે આ બાળકનું મૃત્યુ કોરોનાથી નહિં કેન્સરની બિમારીથી થયું છે.

જામનગરઃ જિલ્લાના લોકોને વિનંતી કરતા કલેક્ટર રવિશંકરે કહ્યું કે, તાજેતરમાં લોકડાઉનમાં થોડી છુટછાટ મળેલ હોવાથી માર્કેટ, રોડ રસ્તા ખૂલી ગયા છે. જ્યાં બહોળી સંખ્યામાં લોકો આવે છે. લોકોએ સાવચેતી રાખવા અને બીનજરૂરી બહાર ન નિકળવા તથા ઘરેથી બહાર નિકળો ત્યારે માસ્ક પહેરવાનું ન ભૂલવું, ઘરેથી બહાર નિકળો ત્યારે થોડાથોડા સમયે હાથ સાબુથી સાફ કરવા સૂચન કર્યું હતું.

કલેક્ટર રવિશંકરે અપીલ કરતાં કહ્યું કે, જેટલા લોકો બહારથી આપણા શેરી, મહોલ્લા, શહેરમાં આવ્યા છે. તે લોકો તેમનો ક્વોરેન્ટાઇન સમય પૂર્ણ કરે તે અંગેની તકેદારી રાખવા નગરજનોને જણાવતા જે ઘરમાં બાળકો અને વૃધ્ધો રહેતા હોય તે લોકોએ બહારથી આવ્યે હાથ ધોયા વગર તેમના સંપર્કમાં ન આવવા અપીલ કરી હતી.