જામનગરઃ ITIની ઓનલાઇન પરીક્ષામાં 30 વિદ્યાર્થીઓને મળ્યા 0 માર્ક્સ

ગત વર્ષે ITIની પરીક્ષા લેવામાં આવી હતી. આ પરીક્ષાનું પરિણામ જાહેર થઈ ગયું છે. જેમાં જામનગર શહેરમાં આવેલી ITIના 30 વિદ્યાર્થીઓને અમુક વિષયોમાં 0 માર્ક મળ્યા છે. જેનું કારણ ટેકનિકલ ખામી હોવાનું ITIના આચાર્ય દ્વારા જણાવવામાં આવ્યું છે.

જામનગરઃ શહેરમાં ગત વર્ષે ITIની પરીક્ષા લેવામાં આવી હતી. આ પરીક્ષાનું પરિણામ જાહેર થઈ ગયું છે. જો કે, પરિણામ જરા ચોંકાવનારું છે. કારણ કે, જે વિદ્યાર્થીઓએ પરીક્ષા આપી છે, તેમાંથી 30 વિદ્યાર્થીઓને અમુક પેપરમાં 0 માર્ક્સ આવ્યા છે. જેના કારણે આ વિદ્યાર્થીઓમાં ભારે નિરાશા જોવા મળી રહી છે.

ETV BHARAT સાથેની વાતચીતમાં ITIના આચાર્ય એમ. એમ. બોચીયાએ જણાવ્યું હતું કે, ટેકનિકલ ખામીના કારણે આ પરિસ્થિતિ સર્જાઈ છે. ગત વર્ષે લેવામાં આવેલી ઓનલાઇન પરીક્ષામાં વિદ્યાર્થીઓએ ટેકનિકલ ખામીને કારણે 0 માર્ક્સ મળ્યા છે. આ બાબતે રાજ્ય સરકાર અને કેન્દ્ર સરકારમાં રિપોર્ટ મોકલવામાં આવ્યો છે. જો કે, આગામી દિવસોમાં યોજાનારી પરીક્ષામાં જે વિદ્યાર્થીઓને ઝીરો માર્ક્સ આવ્યા છે. તેઓ ફરી પરીક્ષા આપી પાસ થઈ જશે.