પાટણ પાલિકાની ચૂંટણીમાં ઉમેદવારો જાહેર કરવામાં ભાજપ-કોંગ્રેસ વચ્ચે ખેંચતાણ

સ્થાનિક સ્વરાજની ચૂંટણીમાં ઉમેદવારોની પસંદગી મામલે ભાજપ-કોંગ્રેસ બંન્‍ને પક્ષોમાં ભડકો થાય તેવી સ્‍થ‍િતિ સર્જાઈ છે. સતાધારી ભાજપમાં આગેવાનોની ખેંચતાણના કારણે આખો દિવસ મંથન કર્યા બાદ મોડીરાત્રે ત્રણ વાગ્‍યે ઉમેદવારોની અધૂરી જાહેરાત કરવાની ફરજ પડી હતી. તો કોંગ્રેસ યાદી જાહેર કરે તે પૂર્વે જ શહેર મહિલા કોંગ્રેસના પ્રમુખે પાર્ટીએ વિશ્વાસઘાત કર્યાના આક્ષેપ સાથે રાજીનામું ધરી દેતા સ્‍થાનિક રાજકારણ ગરમાયું છે.

• પાટણ પાલિકામાં ઉમેદવારોની પસંદગી મામલે બંન્‍ને પક્ષોમાં ભારે ખેંચતાણ
• સ્‍થાનિક આગેવાનોની ખેંચતાણ વચ્‍ચે ભાજપનાં 44 પૈકી 31 ઉમેદવારો મોડીરાત્રે જાહેર
• કોંગ્રેસમાં છેલ્‍લી ઘડીએ ઉમેદવારોની યાદીમાં ફેરફાર કરાવવાની હિલચાલ થતા ભડકો

ગીર સોમનાથ: સ્થાનિક સ્વરાજની ચૂંટણીને લઈને ભાજપ-કોંગ્રેસ બંને પક્ષોમાં ઉમેદવારોનાં નામો જાહેર કરવા માટે પડાપડી થઈ રહી છે. ટિકિટોની ફાળવણીમાં પણ ક્યાંક ખુશી, તો ક્યાંક ગમનો માહોલ જોવા મળી રહ્યો હતો. આ વચ્ચે પાટણ નગરપાલિકાની ચૂંટણી માટે ભાજપે મહા મહેનતે અડધી રાત્રે ઉમેદવારોની અધૂરી યાદી જાહેર કરી હતી. જ્યારે શહેર મહિલા કોંગ્રેસ પ્રમુખે પાર્ટી દ્વારા વિશ્વાસઘાત કરાયો હોવાનાં આક્ષેપ સાથે રાજીનામુ ધરી દીધું છે.

કોંગ્રેસનો ગઢ ગણાતા 2 વોર્ડમાં ઉમેદવારો ન જાહેર કર્યા

વેરાવળ પાટણ નગરપાલિકાની 44 બેઠકોમાં ઉમેદવારોની પસંદગી મુદે ભાજપ અને કોંગ્રેસ બંનેમાં મડાગાંઠની સ્‍થ‍િતિ સર્જાઈ છે. જેમાં સતાધારી ભાજપની વાત કરીએ તો ગુરુવારે આખો દિવસ સ્‍થાનિક ભાજપના આગેવાનોએ મંથન કર્યુ હતુ. જેમાં આંતરિક ખેંચાતણના લીઘે સહમતિ સર્જાતી ન હતી. જો કે, સાંસદ રાજેશ ચુડાસમા, પ્રદેશ મંત્રી ઝવેરીભાઇ ઠકરાર સાથે શહેર સંગઠનનાં હોદેદારોએ સામાજીક ગણીત બેસાડીને ઉમેદવારો પસંદ કરવા બેઠકો યોજી રહ્યા હતા. અંતે મોડીરાત્રે 3 વાગ્‍યાની આસપાસ પાલિકાનાં 8 વોર્ડની 31 બેઠકો માટે ઉમેદવારોનાં નામની જાહેરાત કરવામાં આવી હતી. જ્યારે 4 વોર્ડનાં કુલ 13 ઉમેદવારોની જાહેરાત બાકી રાખવામાં આવી હતી. બાકી રખાયેલા વોર્ડમાં કોંગ્રેસનો ગઢ ગણાતા લઘુમતિ વિસ્‍તારવાળો વોર્ડ નં.5 અને 6નો પણ સમાવેશ થાય છે.

રાજીનામુ આપનાર શહેર મહિલા કોંગ્રેસનાં પ્રમુખ દેવીબેન ગોહેલ

શહેર મહિલા કોંગ્રેસ પ્રમુખે વિશ્વાસઘાત થયો હોવાના આક્ષેપ સાથે રાજીનામું ઘર્યુકોંગ્રેસમાં પણ ઉમેદવારોની પસંદગીમાં સ્‍થાનિક આગેવાનો છેલ્‍લી ઘડીએ ફેરફાર કરાવવા સક્રિય થતા ઉમેદવારો જાહેર કરવામાં વિલંબ થઇ રહ્યો હતો. પક્ષની સત્તાવાર યાદી જાહેર થાય તે પૂર્વે જ શહેર મહિલા કોંગ્રેસનાં પ્રમુખ દેવીબેન ગોહેલે રાજીનામું આપી દેતા ભડકાની સ્‍થ‍િતિ સર્જાઈ છે. મહિલા પ્રમુખ દેવીબેને રાજીનામા પત્રમાં પાર્ટીએ વિશ્વાસઘાત કર્યો હોવાનો ખુલ્‍લો આક્ષેપ કર્યો છે. વઘુમાં તેમણે લખ્યું હતું કે, વર્ષોથી પાર્ટીમાં મળેલી જવાબદારી નિષ્‍ઠાપૂર્વક બજાવી હોવા છતાં થોડા દિવસોથી વેરાવળ પાટણ શહેર કોંગ્રસ પક્ષ દ્વારા મારા હોદ્દા તથા ટીમની અવગણના કરવામાં આવે છે. મારી પાર્ટી પ્રત્‍યેની વફાદારીનું પરીણામ પાર્ટી દ્વારા વિશ્વાસઘાત તરીકે આપવામાં આવ્યું છે. સ્‍થાનિક ચૂંટણીને પ્રાથમિક્તા આપીને હોદેદારનું અપમાન કરવામાં આવી રહ્યું છે. જેથી હું આજની તારીખથી શહેર મહિલા કોંગ્રેસના પ્રમુદ પદેથી રાજીનામુ આપું છું.