વોશિંગ્ટન: અમેરિકી રાષ્ટ્રપતિ ડોનાલ્ડ ટ્રમ્પે ન્યાય મંત્રાલયને લગભગ અડધી સદી જૂના કાયદાને થોભાવવા અને તેની સમીક્ષા કરવાનો નિર્દેશ આપતા એક્ઝિક્યુટિવ ઓર્ડર પર હસ્તાક્ષર કર્યા છે. આ કાયદા હેઠળ અદાણી ગ્રુપ સામે લાંચની તપાસ શરૂ કરવામાં આવી હતી. ટ્રમ્પે ફોરેન કરપ્ટ પ્રેક્ટિસ એક્ટ ઓફ 1977 (FCPA) ના અમલીકરણને સ્થગિત કરવાના આદેશ પર હસ્તાક્ષર કર્યા છે, જે અમેરિકન કંપનીઓ અને વિદેશી કંપનીઓને વેપાર કરવા માટે વિદેશી સરકારોના અધિકારીઓને લાંચ આપવા પર પ્રતિબંધ મૂકે છે.
રાષ્ટ્રપતિએ યુએસ એટર્ની જનરલ પામેલા બોન્ડીને FCPA ના અમલીકરણને રોકવા માટે નિર્દેશ આપ્યો, જે હેઠળ યુએસ ન્યાય વિભાગ અમુક ઉચ્ચ-પ્રોફાઇલ કેસોની તપાસ કરી રહ્યું છે. આ અંતર્ગત ભારતીય ઉદ્યોગપતિ અને અદાણી ગ્રુપના વડા ગૌતમ અદાણી અને તેમના ભત્રીજા સાગર વિરુદ્ધ કેસ દાખલ કરવામાં આવ્યો હતો.
ભૂતપૂર્વ રાષ્ટ્રપતિ જો બાઇડેનની આગેવાની હેઠળની સરકાર હેઠળના ન્યાય મંત્રાલયે ગયા વર્ષે અદાણી પર સૌર ઉર્જા કરાર માટે અનુકૂળ શરતોના બદલામાં ભારતીય અધિકારીઓને યુએસ $ 250 મિલિયન (આશરે રૂ. 2,100 કરોડ) કરતાં વધુની લાંચ આપવાની યોજનાનો ભાગ હોવાનો આરોપ મૂક્યો હતો. જોકે અદાણી ગ્રુપે તમામ આરોપોને ફગાવી દીધા છે.
FCPAને ટાંકીને ફરિયાદીઓએ ગયા વર્ષે આક્ષેપ કર્યો હતો કે આ હકીકત અમેરિકન બેંકો અને રોકાણકારોથી છુપાવવામાં આવી હતી જેમની પાસેથી અદાણી જૂથે પ્રોજેક્ટ માટે અબજો ડોલર ઊભા કર્યા હતા. FCPA વિદેશી ભ્રષ્ટાચારના આરોપો પર કાર્યવાહીની મંજૂરી આપે છે જ્યારે તેઓ યુએસ રોકાણકારો અથવા બજારો સાથે કેટલાક જોડાણ ધરાવતા હોય.
આ કાયદા પર ટ્રમ્પના પ્રતિબંધ અને સમીક્ષાના આદેશને અદાણી જૂથ માટે રાહત તરીકે જોવામાં આવી રહ્યો છે, પરંતુ છ મહિનાના સમીક્ષા સમયગાળા પછી ન્યાય મંત્રાલય શું વલણ લે છે તે જોવાનું રહે છે.
આ પણ વાંચો:
