પોરબંદર-સોમનાથ હાઇવેના કામમાં બેદરકારીના લીધે અનેક અકસ્માતો પણ સર્જાયા છે. રસ્તામાં ધૂળની ડમરીઓ ઉડવાના કારણે લોકોના સ્વાસ્થ્યને પણ અસર થઈ રહી છે. ત્યારે લોકોએ હાઇવેનું કામ ઝડપી કરવા તંત્રને વિનંતી કરી છે.
પોરબંદર-સોમનાથ હાઇવેનું કામ કાચબા ગતીએ: અકસ્માતનો ભય એક તરફ સરકાર દ્વારા પ્રવાસન ક્ષેત્રે વિકાસ કરવાની વાતો રહી છે. કરોડો રૂપિયાનો ખર્ચ કરીને બીચ ફેસ્ટિવલ સહિતના અનેક કાર્યક્રમો યોજવામાં આવે છે, આવી જ રીતે પોરબંદર નજીકના માધવપુર ગામે પણ બીચ ફેસ્ટિવલનું આયોજન કરવામાં આવ્યું છે. પોરબંદરથી માધવપુર પહોંચવા માટેનો હાઈવેનું કામ છેલ્લા દોઢેક વર્ષથી ચાલી રહ્યું છે, પરંતુ હજુ સુધી પૂર્ણ ન થતા લોકોમાં રોષ ભભૂકી ઉઠયો છે. રસ્તામાં ઉડતી ધૂળને કારણે અનેક અકસ્માતો સર્જાયા છે, તો અહીં વચ્ચે આવતા નવાગામના લોકોએ ઓવરબ્રિજ બનાવવાની માંગ પણ કરી હતી. અહીં માંગ હજી સંતોષાઈ નથી, આથી લોકોમાં રોષ જોવા મળી રહ્યો છે. તાત્કાલિક રોડનું કામકાજ પૂર્ણ થાય તેવી વિનંતી લોકોએ તંત્રને કરી હતી.
