ગીર-સોમનાથમાં સિંહોએ રસ્તો રોકતા 108 એમ્બ્યુલન્સમાં કરાઈ મહિલાની પ્રસુતિ

ગીરમાં એક વિરલ ઘટના બની હતી. ગીર સોમનાથના ગીરગઢડા તાલુકાના જંગલ વિસ્તારમાં સિંહો રસ્તા પર ઉતરી આવતા પ્રસૂતાને લઈ જતી 108 ના પૈડાં થંભી ગયા હતા. સગર્ભાને 108 એમ્બ્યુલન્સમાં રસ્તા પર જ પ્રસુતિ કરવાની ફરજ પડી હતી. ત્યારે ડોકટરોની સમય સુચકતાએ માતા અને બાળકને સ્વસ્થ રાખી અને પ્રસુતિ પુરી કરાવી હતી. ત્યારે જાણે સિંહ પરિવાર બાળકના જન્મનું સાક્ષી બનવા આવ્યું હોય એમ પ્રસુતિ બાદ સિંહોએ ત્યાંથી પલાયન કરેલ હતું.

ગીર સોમનાથ : આ દ્રશ્યો છે ગીર સોમનાથના ગીરગઢડા તાલુકાના ભાખા-ગીરગઢડા રોડના જ્યાં શનિવારની રાત્રે ભાખા ગામની સગર્ભા મહિલાને પ્રસુતિનો દુખાવો થતા 108 એમ્બ્યુલન્સને બોલાવવાની ફરજ પડી અને તાત્કાલિક ગીર ગઢડા સી.એચ.સી સેન્ટર ખસેડવા કામગીરી શરૂ થઈ હતી. પણ રસુલપરા ગામ નજીક 4 સિંહ પુરપાટ ઝડપે આવી રહેલી 108 એમ્બ્યુલન્સ સામે આવી ગયા જેના કારણે 108 ને ત્યાં જ રોકી દેવાઈ હતી.

108માં ઇમરજન્સી તરીકે ફરજ બજાવતા કર્મચારીએ ગત રાત્રીને યાદ કરતા કહ્યું કે, "સતત 20 મિનિટ સુધી સિંહ રોડ પર ઉભા રહયા 4 સિંહ હતા, અમે 108ને રોકી દીધી. પરંતુ સિંહ અમારી એમ્બ્યુન્સની પ્રદક્ષિણા કરતા રહ્યાં હતા. સગર્ભાને ખુબ દુખાવો થતો હતો, જેથી સિંહોને ખલેલ ન પહોંચે અને સગર્ભા તેમજ તેમનું બાળક હેમખેમ રહે તે માટે અમે 108માં રોડ પર જ પ્રસુતિ કરાવી હતી. 20 મિનિટ બાદ સિંહો રસ્તા પરથી હટયા બાદ અમે માતા અને બાળકને ગીર ગઢડા સીએસી સેન્ટર સારવારમાં લાવ્યા હતા.

ત્યારે અદભુત અલૌકિક અને આશ્ચર્યચકિત કરનાર ગીરની ગોદમાં વધુ એક એવી ઘટના બની છે. જેને શબ્દોમાં સમજાવવી શક્ય નથી. જાણે બાળકીના જન્મ માટે સિંહો હાજર થયા હોય એમ પ્રસુતિ પૂર્ણ થયે તેઓનું ચાલ્યુ જવું એ સમજવું કે, સમજાવવું શક્ય નથી.