આધુનિક યુગમાં જોઈએ તો, અમીર હોય કે ગરીબ વાલીઓ તેઓ એ બાબતે ચિંતિત હોય છે કે, પોતાના બાળકોને ખાનગી કે સરકારી આ બંન્ને શાળામાંથી કઈ શાળામાં શિક્ષણ આપવું. ત્યારે સંપન્ન લોકો તો તગડી ફી ભરીને ખાનગી શાળામાં પ્રવેશ અપાવીને ચિંતામુક્ત થઈ જાય છે. પરંતુ આ ખાનગી શાળામાં બાળક શિક્ષણ સાથે સંસ્કાર મેળવી શકે છે કે નહીં? ત્યારે આ પ્રશ્નનો જવાબ ગીર સોમનાથની રમળેચીમાં આવેલી પ્રાથમિક શાળામાં જરૂરથી મળી જશે.
આ સરકારી પ્રાથમિક શાળામાં ધો.1થી 8 સુધીના વર્ગો આવેલા છે. જેમાં મહત્વું એ છે કે, આ શાળામાં કુલ 425થી પણ વધુ બાળકો અભ્યાસ સાથે જીવન ઘડતરના પાઠ શિખે છે. તો સાથે જ ગામની ભાગીદારીથી અહીં 5 લાખથી વધુના ખર્ચથી તમામ સુવિધાઓ ઉભી કરવામાં આવી છે. જેમાં આચાર્ય કંટ્રોલ રૂમમાંથી તમામ સુચના આપે છે. જ્યારે CCTVથી તમામ વર્ગોની દેખરેખ પણ કરવામાં આવે છે. આ સાથે જ સ્વચ્છતા માટે રાજ્ય સરકારનો બેસ્ટ એવોર્ડ પણ આ શાળાને મળ્યો છે. અનેક એવોર્ડથી આ શાળાને સન્માનિત કરવામાં આવી છે.
આ ઉપરાંત તમામ બાળકોને પાણી પીવા માટે આરો પ્લાન્ટની પણ વ્યવસ્થા ઉભી કરવામાં આવી છે. સ્વચ્છ રસોઈ ઘર, બે ડીઝીટલ ક્લાસરૂમમાં પ્રોજેક્ટર દ્વારા આધુનિક પદ્ધતિથી શિક્ષણ આપવામાં આવે છે. આ શાળામાં બગીચો તેમજ ઝાડ શાળાનું આકર્ષણ છે. તમામ ઝાડને મહાપૂરુષો તેમજ સંતો અને શુરવીરોના નામ આપવામાં આવ્યા છે. રમળેચી ગામ નાનું હોવા છતા પણ 12થી 15 વાહનોમાં નજીકના શહેર તાલાલાથી વાલીઓ બાળકોને શિક્ષણ અપાવવા માટે ગૌરવ અનુભવે છે.
