ન્યાય માટે આવેલી પાટણની મહિલાએ સચિવાલયમાં એન્ટ્રી ન મળતા આપઘાત કરવાનો કર્યો પ્રયાસ

રાજ્યના પાટનગર ગાંધીનગર નવા સચિવાલયમાં મંગળવાર મુલાકાતી દિવસ હોય છે. પોતાની ઉપર ગામના શખ્સોએ દુષ્કર્મ કર્યો હોવાથી આરોપીઓ સામે કાર્યવાહી કરવામાં આવે તેવી માંગ સાથે બપોરના ચાર વાગ્યાના અરસામાં નવા સચિવાલય ગેટ નંબર 4 ખાતે પાટણની એક મહિલા આવી હતી, પરંતુ તેની વાત પ્રધાનો સુધી નહીં પહોચતા ઝેરી દવા ગટગટાવી હતી.

ગાંધીનગરઃ સચિવાયલ ગેટ નંબર-4 પાસે મંગળવારે સાંજે મહિલાએ ઝેરી દવા પીને આપઘાતનો પ્રયાસ કર્યો હતો. પાટણ તાલુકાના એક ગામમાં રહેતી મહિલા પોતાની રજૂઆત સાથે સચિવાયલ પહોંચી હતી. જો કે, અંદર જવા ન દેવાતા તેને ઝેરી દવા પી લીધી હતી, જેને પગલે હાજર પોલીસે તાત્કાલિક 108 બોલાવી મહિલાને ગાંધીનગર સિવિલમાં સારવાર માટે ખસેડી હતી.

મહિલાનો આક્ષેપ છે કે, તેના ગામના 2 શખ્સોએ તેના પર દુષ્કર્મ ગુજાર્યો છે અને પોલીસ ફરિયાદ નોંધતી નથી. એટલે તે ગાંધીનગર રજૂઆત કરવા આવી હતી, આખો દિવસ ફર્યા પછી પણ અંદર જવા ન મળતા તેને દવા પી લીધી હતી. ઘટનાને પગલે પોલીસે જરૂરી નોંધ કરીને કાયદેસરની કાર્યવાહી હાથધરી હતી..