ગાંધીનગર : બોટાદ ના સારંગપુર કષ્ટભંજન દેવ હનુમાન દાદાની મૂર્તિ નીચે ભીંતચિત્રો મૂકવામાં આવ્યા છે. આ ભીંતચિત્રોનો વિવાદ સમગ્ર ગુજરાતમાં ગાજી રહ્યો છે. આ વિવાદમાં નવા નવા ફણગાં અને બણગાં ફુટતા જાય છે. આજે આ વિવાદમાં બોટાદના ધારાસભ્ય દ્વારા ગુજરાત રાજ્ય સરકાર પાસે માંગણી કરવામાં આવી છે. AAP ધારાસભ્ય ઉમેશ મકવાણાએ હાઈ લેવલ કમિટિ રચવાની માંગણી કરી છે.
વિદેશી ફંડની તપાસ કરોઃ સાળંગપુર વિવાદમાં ગઈકાલે સનાતન ધર્મના સાધુ સંતોની બેઠકમાં ભીંતચિત્રોને હટાવવા માટે બુલંદ માંગ કરવામાં આવી હતી. આજે બોટાદના ધારાસભ્ય ઉમેશ મકવાણાએ પણ રાજ્યના મુખ્ય પ્રધાન ભુપેન્દ્ર પટેલને પત્ર લખ્યો છે. જેમાં આ વિવાદને થાળે પાડવાની રજૂઆત કરવામાં આવી છે. ઉપરાંત એક હાઈ લેવલ કમિટિ રચી વિદેશી ફંડિંગ બાબતે સઘન તપાસ કરવાની માંગણી પણ કરવામાં આવી છે.
મારા મત વિસ્તાર બોટાદમાં આવેલ સાળંગપુર ધામમાં છેલ્લા 10 દિવસથી માહોલ ખરાબ છે, ભીંતચિત્રો મારફતે હિન્દુ સમાજના 2 ભાગલા કરવાનો પ્રયાસ ચાલી રહ્યો છે. રાજ્ય સરકાર આ મામલે તાત્કાલિક ધોરણે હાઈ લેવલ કમિટિની રચના કરે. ઉપરાંત વિદેશથી કરોડો અને અબજો રૂપિયાનું ફંડ આવી રહ્યું છે તે બાબતે પણ રાજ્ય સરકાર દ્વારા તપાસ કરવામાં આવે. રાજ્ય સરકાર સત્વરે પગલાં ભરી સમગ્ર વિવાદનો અંત લાવે...ઉમેશ મકવાણા (MLA, બોટાદ, આમ આદમી પાર્ટી)
હિન્દુ ધર્મના બે ફાંટા પાડવાનો બદઈરાદોઃ MLA ઉમેશ મકવાણા દ્વારા સચિવાલયના સ્વર્ણિમ સંકુલ 1 ખાતે મુખ્ય પ્રધાન કાર્યાલયમાં લેખિત રજુઆત કરાઈ છે. લેખિત રજૂઆત બાદ ધારાસભ્યએ મીડિયાને સમગ્ર વિવાદમાં પોતાના મતવિસ્તારની સ્થિતિ અને હિન્દુ ધર્મના બે ફાટા થવા વિશે જાણકારી આપી હતી. ઉલ્લેખનીય છે કે આજે સાંજ સુધીમાં રાજ્યના મુખ્ય પ્રધાન ભુપેન્દ્ર પટેલ અને વડતાલ સ્વામીનારાયણ મંદિરના 15 જેટલા સંતોની બેઠક સ્વર્ણિમ સંકુલ 1 અથવા તો મુખ્ય પ્રધાન નિવાસ સ્થાને મળવાની છે. આ બાબતે કોઈ નક્કર નિર્ણય નજીકના ભવિષ્યમાં આવે તેવી શક્યતાઓ છે.
