સચિવાલયના 5 બ્લોકમાં લાઈટ ગુલ, જનરેટરથી કામ ચલાવવું પડ્યું

રાજ્ય સરકાર દ્વારા ૨૪ કલાક વીજળીની વાતો કરવામાં આવે છે પરંતુ સચિવાલયના બ્લોકમાં જ વીજળી ગુમ થતાં આજે સવારથી જ જનરેટરની મદદથી 5 બ્લોકમાં વીજળી પુરી પાડવામાં આવી હતી.

ગાંધીનગર : સૂત્રોની જાણકારી પ્રમાણે સ્વર્ણિમ સંકુલ 2ની સામે આવેલ બ્લોક 12, 8 અને 11માં આજ સવારથી વીજળી ગુલ થઈ ગઈ હતી. ટેક્નિકલ કારણોસર 5 જેટલા બ્લોકમાં વીજળી ગુલ થઈ હતી. જેથી તાબડતોબ 3 જેટલા જનરેટરથી 5 બ્લોકમાં વીજળી પુરી પાડવામાં આવી હતી. ઉલ્લેખનીય છે કે રાજ્ય સરકાર દ્વારા ગ્રામ્ય વિસ્તારોમાં અને ખેડૂતોને ગણતરીના કલાકો પ્રમાણે વીજળી આપવામાં આવે છે જ્યારે સચિવાલયમાં ગણતરીના કલાકોમાં જ જનરેટરથી વીજળી પૂરી પાડવામાં આવી હતી.

આમ વીજળી કયા કારણથી ગુલ થઈ હતી તે હજુ સુધી જાણવા નથી મળ્યું. પરંતુ ટેક્નીકલ કારણથી વીજળી ગુલ થઈ હોવાનું પણ સૂત્ર તરફથી માહિતી પ્રાપ્ત થઇ રહી છે. જ્યારે આ તમામ લોકોને આજે ત્રણ જનરેટરથી વીજળી પૂરી પાડવામાં આવી હતી..