રાજ્યમાં વરસાદ તો ખરો, પરંતુ 23 તાલુકામાં 100 મી.મી.પણ વરસાદ નહીં !!!!

ગાંધીનગરઃ સમગ્ર રાજ્યમાં મેઘરાજાની ધમાકેદાર બૅટિંગ ચાલી રહી છે. રાજ્યમાં સાર્વત્રિક વરસાદ જોવા મળી રહ્યો છે, પરંતુ હજૂ પણ 23 તાલુકા એવા છે જ્યાં પુરતા પ્રમાણમાં વરસાદ વરસ્યો નથી, ત્યારે તંત્રની ચિંતામાં વધારો થયો છે. ગુજરાતના કુલ જિલ્લાઓ પૈકી હજૂ પણ 11 જિલ્લાના 23 તાલુકા એવા છે જ્યાં વરસાદના પ્રમાણની વાત કરીએ તો સરેરાશ આંકડો પણ 100 મીલીમીટરને પાર પહોંચ્યો નથી. આ એવા જ વિસ્તારો છે કે જ્યાં, ગત વર્ષે પણ વરસાદની માત્રા ઓછી જ હતી. આ 24 કલાકમાં પડેલા વરસાદની સ્થિતિ જરૂરિયાત વરસાદ કરતા અનેકગણી ઓછી જોવા મળી છે.

રાજ્યમાં વરસેલા વરસાદની સરખામણીએ અંદાજિત વરસાદ

જિલ્લો	તાલુકો	અંદાજિત જરૂર (મીમી)	હાલનો વરસાદ (મીમી)
કચ્છ	ગાંધીધામ	396	14
	અંજાર	426	66
	નખત્રાણા	392	52
પાટણ	ચાણસ્મા	506	75
	સમી	525	81
	સાંતલપુર	458	55
	સંખેશ્વર	523	65
સુરેન્દ્રનગર	દસાડા	560	44
	ધ્રાંગધ્રા	517	84
	લખતર	575	88
મોરબી	હળવદ	450	59
	માળીયા-મિયાણાં	461	90
	મોરબી	559	85
મહેસાણા	જોટાણા	737	87
	વડનગર	670	91
દેવભુમિ દ્વારકા	ભાણવડ	617	69
	દ્વારકા	453	94
અમદાવાદ	માંડલ	562	43
	વિરમગામ	661	76
બનાસકાંઠા	દાંતીવાડા	619	86
ગાંધીનગર	ગાંધીનગર	704	87
આણંદ	તારાપુર	664	96
વડોદરા	સાવલી	862	80

આમ, સરેરાશ જોવા જોઈએ તો મોડે-મોડે પણ રાજ્યમાં વરસાદની હેલી આવતાં ખેડૂતોમાં આશા અને અપેક્ષા જાગી છે. રાજ્ય સરકાર દ્વારા ઉપલબ્ધ આંકડા અનુસાર જોઈએ તો ચાલુ વર્ષે 68 ટકા જેટલું વાવેતર અત્યાર સુધીમાં રાજ્યમાં કરાયું છે ત્યારે આગામી પાંચ દિવસમાં હજુ પણ ભારે અને સાર્વત્રિક વરસાદ વરસશે તેવી હવામાન વિભાગે આગાહી કરી છે ત્યારે જગતનો તાત હોલ તો આકાશમાંથી પડી રહેલા કાચા સોનાનો સદુપયોગ કરવામાં લાગી ગયો છે.