ગાંધીનગર: આજે ગાંધીનગર ખાતે સીઆઇડી ક્રાઇમની કામગીરીની રીવ્યુ બેઠકમાં સમીક્ષા કરતા ગૃહ રાજ્ય પ્રધાન હર્ષ સંઘવીએ ઉમેર્યું હતું કે ભૂપેન્દ્ર પટેલના માર્ગદર્શન હેઠળ રાજ્યમાં કાયદો વ્યવસ્થાની પરિસ્થિતિ સુપેરે જળવાઈ રહે એ માટે પોલીસ તંત્ર સંનિષ્ઠ પ્રયાસ કરી રહ્યું છે. ત્યારે સમગ્ર પોલીસ દળ એક યુનિક ડીઝાઇન અને કોન્સેપ્ટ સાથે કામગીરી કરશે તો પ્રજાજનોને વધુને વધુ સારી સુવિધાઓ પુરી પાડી શકાશે.
બાળકોને શોધવાની કામગીરી: હર્ષ સંઘવીએ ઉમેર્યુ કે, રાજ્યની સીઆઇડી ક્રાઇમ બ્રાન્ચ ફક્ત નોડલ એજન્સી તરીકે ન રહેતા તેઓએ તમામ પ્રકારની કામગીરી કરવાની રહેશે. અભય કોલ પર જ્યારે કોલ આવે ત્યારે જે ટીમ જાય છે. તેમાં શી ટીમનો પણ સમાવેશ કરાશે. આ ઉપરાંત એનડીપીએસ અને સાયબર ક્રાઇમની કામગીરીને વધારે અસરકારક અને વ્યાપક બનાવવા સંબંધિત સૂચનાઓ આપી હતી. તેમજ રાજ્યમાં ગુમ થયેલા બાળકોને શોધવાની કામગીરી અને નાસતા ફરતા આરોપીઓને પકડવા માટેની સીઆઇડી ક્રાઇમ દ્વારા કરવામાં આવતી કામગીરીને બિરદાવી હતી.
ઉચ્ચ અધિકારીઓ ઉપસ્થિત રહ્યા: આગામી સમયમાં એકશન પ્લાન બનાવી વધુ સઘન કામગીરી કરવા સૂચના આપી હતી. આ રીવ્યુ બેઠકમાં પો.મ.નિ. અને મુ.પો.અ. અને અ.પો.મ.નિ. (સીઆઇડી ક્રાઇમ) અને સીઆઈડી ક્રાઇમના રાજ્યના તમામ નાયબ પોલીસ અધિક્ષક સહિત તમામ ઉચ્ચ અધિકારીઓ ઉપસ્થિત રહ્યા હતા. પોલીસ અધિકારી સમક્ષ સીઆઇડી ક્રાઇમની કામગીરીઓનું વિસ્તૃત પ્રેઝન્ટેશન કરીને જરૂરી વિગતો પુરી પાડી હતી.
હર્ષ સંઘવીએ કરી ઉજવણી: ભારત દેશના તમામ નાગરિકો માટેની ઐતિહાસિક ક્ષણ સાંજના 6 વાગીને ચાર મિનિટે આવી જ્યારે ચંદ્રયાન ત્રણનું સફળ લેન્ડીંગ થયું. ગુજરાતમાં પણ સરકારના પ્રધાનો દ્વારા અલગ અલગ જગ્યા ઉપર ચંદ્રયાન 3ની લેન્ડિંગની પ્રક્રિયા લાઇવ નિહાળવાનું આયોજન કરવામાં આવ્યું હતું. જેમાં રાજ્યકક્ષાના ગૃહ પ્રધાન હર્ષ સંઘવી પોલીસ ભવનમાં અને રાજ્ય કક્ષાના શિક્ષણ પ્રધાન પ્રફુલ પાનસેરીયાએ બોરીજની પ્રાથમિક શાળામાં ચંદ્રયાન ત્રણનું સફળ લેન્ડિંગ લાઈવ નિહાળ્યું હતું.
