પેથાપુર પોલીસ સ્ટેશન દ્વારા બુધવારે ધનજી ઓડના નિવાસ્થાને બીજી નોટિસ ફટકારવામાં આવી હતી. અગાઉ આગોતરા જામીન માટે અરજી કરવામાં આવી હતી. પરંતુ જામીન અરજી રિજેક્ટ થયા બાદ ધનજી ઓડને હાજર થવા માટે જણાવવામાં આવ્યું હતું. તેમ છતાં હાજર નહીં થતાં એક નોટિસ ફટકારી હતી. નોટિસ ફટકાર્યા બાદ પણ ધનજી દ્વારા હાજર થવામાં નહીં આવતા 11 સપ્ટેમ્બર મંગળવારે બીજી નોટિસ ફટકારવાની સાથે જ ધનજી ઉર્ફે ઢબુડીમાં પેથાપુર પોલીસ સ્ટેશનમાં અડધી રાત્રે પોતાની સાથે વિસનગરની સમર્થક મહિલા અને ચાંદખેડાના પુરુષ સમર્થક સાથે જવાબ લખવા માટે એકાએક પ્રગટ થયો હતો.
ધનજી ઓડે પોલીસને જવાબ આવ્યા બાદ મીડિયાને જણાવ્યું હતું કે, મેં મારો જવાબ પોલીસ સ્ટેશનમાં રજૂ કરી દીધો છે. પેથાપુર પોલીસ સ્ટેશનના PSI એ.જી.એનુરકરે જણાવ્યું કે, ધનજી ઓડ ઉર્ફે ઢબુડી જવાબ લખવા માટે આવ્યો હતો. બાદમાં તેમનો જવાબ રજૂ કર્યા બાદ રવાના થઇ ગયો હતો. પોલીસ દ્વારા તેમનો જવાબ લખવામાં આવ્યો છે. ત્યારે આગળની કાર્યવાહી હવે પછી કરવામાં આવશે.
