એશિયન ગેમ્સમાં ગોલ્ડ મેડલ મેળવી ભારતનું નામ રોશન કરનાર સરિતા ગાયકવાડ શિખરતાની સીડીઓ ચડતી જ જાય છે. સરિતાએ હાલમાં જ પોલેન્ડ ખાતે રમાયેલી યુરોપ એથ્લેટીક્સ 2019માં ભાગ લીધો હતો.જેમાં 400 મીટર મહિલા દોડમાં અન્ય 14 પ્રતિસ્પર્ધીને પાછળ રાખી 54.21 સેકન્ડમાં લક્ષ પૂરો કર્યો હતો. ત્યારબાદ તરત જ પોલેન્ડની નેશનલ Kutno Athletics Meetમાં ફરી વખત બીજો ગોલ્ડ મેડલ જીત્યો છે. સરિતાએ ફરી એકવાર વિદેશની ધરતી ઉપર ભારત માટે દોડ લગાવી અને પ્રથમ ક્રમાંક મેળવી દેશ તેમજ ગુજરાતનું નામ રોશન કર્યુ છે. આ સમાચારથી દીકરીની સિદ્ધિ બદલ તેના માતાપિતાએ ખુશી વ્યક્ત કરી છે.
ડાંગ જિલ્લાના લોકો સરિતાનું ઉમળકાભેર સ્વાગત કરવા લોકો આતુર બન્યા છે. ગરીબ પરિવારમાં ઉછેરેલ સરિતા ગાયકવાડ પોતાની મહેનતે રમત ક્ષેત્રે આગળ આવી છે, જેના ઘરે આજે પણ ભૌતિક સુવિધાનો અભાવજોવા મળે છે. સરિતાના કાચા ઘરમાં મેડલોનો ભરમાર છે. એક મુલાકાત દરમ્યાન સરિતાના માતા-પિતાએ જણાવ્યું હતું કે સરિતા પાછી આવીને ઘરનો પાયો નાખશે.
