- બસ ડેપોથી 23 વર્ષીય યુવક મહિલાને ફોસલાવીને એકાંતમાં લઈ ગયો
- યુવક મહિલા પર દુષ્કર્મ આચરી નાસી છૂટ્યો હતો
- સમગ્ર ઘટનાં અંગે મહિલાના ભાઈ દ્વારા પોલીસ સ્ટેશનમાં ફરિયાદ નોંધવાઈ
ડાંગઃ પોલીસ સૂત્રો પાસેથી મળતી માહિતી મુજબ ડાંગ જિલ્લાનાં આહવાના એક ગામની અસ્થિર મગજની મહિલાને માતા સારવાર માટે તારીખ 01-12-2020નાં રોજ આહવા સિવિલ હોસ્પિટલમાં લઈ ગઈ હતી. બાદમાં આ અસ્થિર મગજની મહિલા અને માતા આહવા એસ.ટી ડેપો ખાતે ગયા હતા. જ્યાં માતા આ અસ્થિર મગજની દીકરીને એસ.ટી ડેપોનાં બાંકડા પર બેસાડી બસ કેટલા વાગે આવશેનું પૂછવા માટે પૂછપરછ બારીએ ગયા હતા. તે અરસામાં ગાઢવી ગામનો 23 વર્ષીય યુવક આ 37 વર્ષીય અસ્થિર મગજની મહિલાને દુષ્કર્મનાં ઈરાદે ફોસલાવી લાલચ આપી ચાલતા ચાલતા સનસેટ પોઈન્ટ વિસ્તારમાં આવેલા અવાવરૂ જગ્યાએ લઈ ગયો હતો. અહી આહવાનાં સનસેટ પોઇન્ટ નજીક અવાવરૂ જગ્યાએ આ 37 વર્ષીય અસ્થિર મગજની મહિલા સાથે 23 વર્ષીય યુવક દ્વારા દુષ્કર્મ આચરી નાસી છૂટતા ચકચાર મચી હતી.
દુષ્કર્મ આચરનારા યુવક વિરૂદ્ધ આહવા પોલીસ સ્ટેશને ફરિયાદ દાખલ કરાઈ
આ ઘટનાની જાણ મહિલાના પરિવારજનોને થતા આ ભોગ બનનારી મહિલાનાં ભાઈએ આહવા પોલીસ સ્ટેશનમાં ફરિયાદ નોંધાવી હતી. આહવા પોલીસ મથકનાં PSI પી. એમ. જુડાલે આરોપી યુવકની ધરપકડ કરી દુષ્કર્મનો ગુનો નોંધી વધુ તપાસ હાથ ધરી છે.
