દાદરાનગર હવેલીમાં ભારે પવનને કારણે વૃક્ષ પડતા બે બળદના મોત

સેલવાસઃ કેન્દ્રશાસિત પ્રદેશ સેલવાસના કિલવણી ગામે વાયુ વાવાઝોડાના પગલે આવેલા ભારે પવન થકી એક વૃક્ષ ધરાશાયી થતાં 2 બળદોના મૃત્યુ થયા છે. ત્યારે આ અંગે જિલ્લા કલેકટર કન્નન ગોપીનાથને અસરગ્રસ્ત આદિવાસીના પશુધનનું વળતર આપવાની બાંહેધરી આપી હતી.

સેલવાસના કિલવણી ગામે બુધવારે સાંજે 6 વાગ્યે ભારે પવન સાથે વરસાદમાં રોડ પરનું નિલગીરીનું વૃક્ષ ધરાશાયી થતા 2 બળદના ઘટનાસ્થળ પર જ મોત થાય હતા.આદિવાસી પરિવારના ઘર પર ઝાડ પડતા આંગણામાં બાંધેલ 2 બળદો ના ઘટનાસ્થળે જ કરુણ મોત નિપજ્યા હતા. જયારે એક ગર્ભવતી ગાયને કરોડરજ્જુ અને પેટના ભાગે ગંભીર ઇજા થઈ છે.

બનાવની જાણકારી મળતા જ ફાયર ફાઈટર પહોંચી ઝાડને હટાવવાની કામગીરી બજાવી ઇજાગ્રસ્ત ગાયને બહાર કાઢી હતી. વાયુ વાવાઝોડાએ મચાવેલો તાંડવવેગ એટલો જોરદાર હતો કે, ઝાડ પડ્યા બાદ એક બળદનું શીંગડું જ તૂટીને નજીકના અન્ય ઘરના છાપરા પર પડ્યું હતું. ત્યારે આ ગમખ્વાર ઘટના અંગે કલેકટર કન્નન ગોપીનાથને પણ પશુધન ધરાવતા માલિકને આ બે બળદોના અકસ્માત મોત બદલ વળતર આપવાની ખાતરી આપી હતી.